راولپنڈی۔ 26 مارچ(اے پی پی) بنجائی وزیر ریلوے شیخ رشید احمد پارینے کہ مسکوہی وزیراعظم شاہد خاقان عباسی تینا کرتوت آتا سوب آن نیب آ ہِننگ ءِ ، این آر او بیرہ شہباز شریف خواہنگ ءِ ، بلاول منہ سد خلقت ءِ بٹنگسا سمجھک کہ او ہیرو اسے، عمران خان تون ایلم کون آ تعلقداری ءِ، و اواوڑتون سلوک ءِ۔ داہیت ءِ او پوسٹ گریجویٹ کالج زالبول راولپنڈی نا سالانہ دود آن پد میڈیا تون گپ و تران کرسا پارے۔ اوپارے کہ شاہد خاقان عباسی تینا کرتوت آتا سوب آن نیب آ ہِننگ ءِ، ای بطور بنجائی وزیر ہراکاغد آتے تروئی ئس اوفتے تسونٹ، ایلو کاریم نیب انا ءِ۔ اوپارے کہ ای دا ہیت آ حیران اُٹ کہ او پیشن ہنسا انٹرنیشنل کمپنی تیان ورندی تیار کرفنگ ءِ۔ بنجائی وزیر پارے کہ این آر او بیرہ اسہ ہی بندغ اس خواہنگ ءِ و او شہباز شریف ءِ، بلاول ٹرین اٹی منہ سد خلقت ءِ بٹنگسا تینے ہیرو اس سمجھنگ ءِ ولے نن اوفتا وڈی خوری نا سیاست ءِ چٹفنہ۔ اسہ سوج اسے نا ورندی ٹی اوپارے کہ نواز شریف نا ضمانت نا بابت سپریم کورٹ انت کہ فیصلہ اس کیک او سہی ہی مریک۔ شیخ رشید احمد پارے کہ اونا وزیراعظم عمران خان تون ایلم کون آ تعلقداری ءِ ہراڑاا و گمر کیک ، و اوڑتون سلوک ءِ و اونا ہچ کس تون ہچ ءُ جھگڑا اس اف۔ اوپارے کہ عمران خان پنچ شنبے نادے آ جناح ایکسپریس نا بناءِ کیک ہرا کنکن شرف نا سوب ءِ۔ وزیر ریلوے پارے کہ او کوئٹہ کراچی و گوادر آ ہِننگ ءِ، ریلوے اسٹیشن نا جاگہ ءِ ہلکونن و ٹریک نا جاگہ ءِ ہم ہلنگ اُن اگہ عمران خان پارے کہ تو نن گوادر ریلوے اسٹیشن نا بنداو ءِ تخنہ۔
