راولپنڈی۔ 26مارچ(اے پی پی) بنجائی وزیر ریلوے شیخ رشید احمد پارینے کہ او پوسٹ گریجویٹ کالج زالبول سکستھ روڈ ءِ یونیورسٹی اس جوڑ کرفنگ کن کڑد ادا کیک، کینٹ انا علاقہ ٹی ہم گرلز کالج اس جوڑ کننگ اُن، زالبول نا تعلیم آن بیدس راج شون ہلنگ کپک۔ داہیت ءِ اوپوسٹ گریجویٹ کالج زالبول سکستھ روڈ راولپنڈی نا سالانہ دود آن تران کرساپارے۔ داوخت آ کالج نا پرنسپل پروفیسر ڈاکٹر عالیہ سہیل خان ، استاد و طالب علم آتا بھلو کچ اس ساڑی ئسر۔ شیخ رشید احمد پارے کہ اوخوش ءِ کہ او شار انا اسہ بھلو درسگاہ سے ٹی بطور مہمان خاص بشخ ہلنگ ءِ، کنا ایمان ءِ اگہ لمہ غاک خوانندہ مریر تو راج انا تقدیر بدلینگک۔ اوپارے کہ فاطمہ جناح یونیورسٹی جوڑ کننگ آ استیفہ تروئی تما ولے ای ہمت ءِ ہلتوٹ و یونیورسٹی اس جوڑ کریٹ، داسہ دایونیورسٹی ٹی ہفت ہزار طالب علم تعلیم دوئی کننگ ءُ۔ اوپارے کہ سیاست اٹی کنے اخس کہ پلاٹ ملا ہموڑے کالج جوڑ کریٹ، راولپنڈی ٹی مسن تے کن 60تعلیمی ادارہ جوڑ کریٹ و اینو پاکستان اٹی ویمن ایجوکیشن اٹی راولپنڈی اولیکو نمبر آٹے۔ بنجائی وزیر پارے کہ راولپنڈی کینٹ اٹی ویمن پوسٹ گریجویٹ کالج پوروی نا آخریکو مرحلہ غاتے ٹی ءِ۔ اوپارے کہ پرنسپل صاحبہ نا پرزور خواست آ او دا کالج ءِ ہم ویمن یونیورسٹی اس جوڑ کرفنگ اٹ کڑد ادا کیک، اوطالب علم آتے پنت و شون کرے کہ او تینا غٹ تر چکار ءِ تعلیم آ کیر و سوگو راج اسے نا جوڑ کننگ اٹ تینا کڑد ءِ ادا کیر۔ اونمان کارکڑدنشان تروک آ طالب علم آتے ٹی شیلڈ بشخ وپانٹ کرے۔ داکان مست کالج نا پرنسپل پروفیسر ڈاکٹر عالیہ سہیل خان مہمان خاص شیخ رشید نا منت واری ءِ ہرفے۔ ایسر اٹی بنجائی وزیر ریلوے شیخ رشید احمد ءِ اعزازی شیلڈ اس پیش کننگا۔
