پاکستان مقبوضہ کشمیر نا کودک باتی تیاکروک آ بیدادی نا برخلاف ہر کہول آ ہیت کرسا کیک، پلوامہ واقعہ غان پد مقبوضہ کشمیر اٹی برجا بھارتی بیدادی نا شدت اٹی ودکی مسنے، وزیر خارجہ مخدوم شاہ محمود قریشی نا یورپی پارلیمنٹ نا باسک واجد خان و پاک یورپین یونین فرینڈ شپ فیڈریشن نا چیئرمین پرویز لوسر تون گپ و تران
اسلام آباد۔ 26مارچ(اے پی پی) وزیر خارجہ مخدوم شاہ محمود قریشی پارینے کہ پاکستان مقبوضہ جموں و کشمیر نا کودک باتی تیا کروک آ بیدادی نا برخلاف ہر کہول آ ہیت کرسا کیک، پلوامہ واقعہ غان پد مقبوضہ جموں و کشمیر اٹی برجا بھارتی بیدادی نا شدت اٹی ودکی مسنے۔ داخیال آتا درشانیءِ او سے شنبے نادے آ باسک یورپین پارلیمنٹ واجد خان و پاک یورپین یونین فرینڈ شپ فیڈریشن نا چیئرمین پرویز لوسر تون گپ و تران اٹی کرے ہراوزارت خارجہ ٹی اوڑتون اوڑدہی کریر۔ اوڑدہی ٹی مقبوضہ جموں و کشمیر اٹی برجا بھارتی بیدادی و انسانی حق انا سنگین خلاف ورزی تا بابت گپ و تران مس۔ ہڑتوم آ شرفمند آ مہمانک یورپین پارلیمنٹ نا ہیومن رائٹس کمیٹی ٹی مقبوضہ جموں و کشمیر اٹی انسانی حق انا لتاڑنگ تون تعلقدار سماعت نا سرجم آتیان ہم وزیر خارجہ ءِ معلومدار کریر۔ داوخت آ وزیر خارجہ مخدوم شاہ محمود قریشی کودک کشمیری تیا جاری سنگین بیدادی ءِ یورپین پارلیمنٹ اٹی ہرفنگ آ واجد خان نا خاص کر و کشمیری پردیسی تا بالعموم منت واری ءِ ہرفے۔ مخدوم شاہ محمود قریشی پارے کہ مقبوضہ جموں و کشمیر اٹی انسانی حق انا ناگفتہ بہ حالیت آتیا ہیومن رائٹس کمیشن و آل پارٹیز پارلیمانی پڑک نا چشم کشا رپورٹ آک جہانی ضمیر ءِ جھنجھوڑ کرسا تخانو، دا رپورٹ آتا مطالعہ غان پاکستان نا موقف نا تائید مریک۔ اوپارے کہ پلوامہ واقعہ غان پد مقبوضہ جموں و کشمیر اٹی برجا بھارتی بیدادی نا شدت اٹی ودکی مسنے۔ پاکستان، مقبوضہ جموں و کشمیر نا کودک باتی تیا کروک آ بیدادی نا برخلاف ہر کہول آ ہیت کرسا کیک۔
