اقوام متحدہ۔ 25مارچ (اے پی پی) پاکستان، ترکی، اوغانستان و ایران تون اوار اسہ درزن ملک آتا کنڈآن اقوام متحدہ نا ہیڈ کوارٹر نیویارک اٹی ہتم نا بننگ نا تہوار نوروز ءِ اڈتننگا ہراٹی اقوام متحدہ نا سدآ کمامدارآک و سفارت کار آک بشخ ہلکر۔ رنگ رنگی آ فوڈ فیسٹیول ءِ دوداٹی مرکزی ءُ حیثیت اس دوئی ئس۔ ایران نا کماشی ٹی دا دود انا بست و بند ءِ کروک آ ایلو ملک آتے ٹی آذربائیجان، بھارت، عراق، قزاخستان، کرغزستان، تاجکستان، ترکمانستان و ازبکستان اوار ئسر۔ دود اٹی بشخ ہلوک آتے دا ملک آتا روایتی کن وخور اس ہم پیش کننگا۔ پاکستان نا اسٹال بشخ ہلوک آتا غٹ آن زیات است خواہی نا مرکز ئس ہراڑے اوفک بریانی، سیخ کباب، سموسہ، گلاب جامن، گجر نا حلواہ و برفی تے بھاز شوق اٹ کنگر۔ اقوام متحدہ ٹی پاکستان نا آخبتی مندوب ڈاکٹر ملیحہ لودھی بشخ ہلوک آتا ستاءِ کرے۔ داوخت آ اسہ انٹرویو اسے ٹی اوپارے کہ نوروز مفاہمت و گچین ہمسائیگی نا کمک اٹ امن ءِ مون آ دیک۔ دا ننے سگ، یکجہتی ، ہم گرنچی کون آ قدر آتے ہیل ترسا ننے ٹی دنیا ٹی امن ، انصاف و شونہالی اتنگ نا است خواہی ودی کیک۔ اسہ ہندن ءُ وخت اسے ٹی ہراتم دنیا ءِ بے سگ، درملکی تیان خار و اسلاموفوبیا غان گڑتی مون تروک ءِ، نوروز نا تہوار ننے اومیت نا روشنائی اسے ہرا ننے اقوام عالم نا نیام اٹ تحمل، ڈائیلاگ و مفاہمت ءِ مون آ درسا اسہ پوسکن ءُ بنااس کننگ نا کلہو ءِ ایتک۔ اومستی پارے کہ نوروز ءِ جہانی کہول آ تالان کننگ اٹ کڑد ادا کرسا پاکستان دا تہوار تون گنڈوک دودوربیدگ ءِ رکھ کننگ نا کوشست آتے ٹی اوار مسنے ہرانا منظوری ءِ اقوام متحدہ نا جنرل اسمبلی 2010 ء ٹی تسوسس۔
