پاکستان نا شونداری بلوچستان نا شونداری تون گنڈوک ءِ، تدوک آ پنچ سال اٹی پاک چین اقتصادی راہداری ڈٹ انا دیکی کوریڈور آ بلوچستان نا تہہ ٹی ہچ ءُ میگا پروجیکٹ اسے نا بناءِ کننگتنے، بنجائی وزیر ڈٹ بندی و شونداری مخدوم خسروبختیار نا کوئٹہ ٹی وزیراعلیٰ بلوچستان جام کمال خان تون اوار صحافی تتون گپ و تران
کوئٹہ۔ 25مارچ(اے پی پی) بنجائی وزیر ڈٹ بندی و شونداری مخدوم خسروبختیار پارینے کہ پاکستان نا شونداری بلوچستان نا شونداری تون گنڈوک ءِ ، تدوک آ پنچ سال اٹی پاک چین اقتصادی راہداری ڈٹ انا دیکی کوریڈور آ بلوچستان نا تہہ ٹی ہچ ءُ میگاپروجیکٹ اسے نا بناءِ کننگتنے، وزیراعظم عمران خان زوت اسے اٹ تینا کوئٹہ نا دورہ ٹی بھلو زر اسے آن دیکی کوریڈور نا اسہ بھلو ڈٹ اس کوئٹہ کچلاک ژوب شاہراہ نا بناءِ کیک و دا ڈٹ آ ساڑی مالی سال اٹی کاریم نا بناءِ کننگک۔ داخیال آتا درشانی ءِ او دوشنبے نادے آ وزیراعلیٰ سیکرٹریٹ اٹی وزیراعلیٰ بلوچستان جام کمال خان ، صوبائی وزراء ظہور احمد بلیدی، حاجی نور محمد دمڑ، زمرک خان اچکزئی ، چیف سیکرٹری ڈاکٹر اختر نذیر و اسمبلی نا باسک دنیش کمار، لالہ رشید بلوچ تون اوار صحافی تتون گپ و تران کرسا کرے۔ بنجائی وزیر ڈٹ بندی و شونداری مخدوم خسرو بختیار پارے کہ وزیراعلیٰ بلوچستان جام کمال خان تون اوڑدہی بے کچ مثبت مس، است بڈ ئس، وزیراعلیٰ بلوچستان مثبت سوچ و ویژن نا مالک ءِ ہراڑتون بھلو وخت اسے آن دیرنہ و دوستانہ تعلق مسنے و اودے بنجائی حکومت نا کنڈآن کوئٹہ گلیڈی ایٹرز نا سرسہبی آ مبارکباد ہم پیش کرے، اوپارے کہ مالی سال 2019-20 ء ٹی بلوچستان اٹی بنجائی حکومت بھلا ڈٹ آتا بناءِ کرینے ہرافتے ٹی گوادر ءِ نیشنل گریڈ اتون گنڈنگ نا ءِ و بھاز اہم انگا روڈ انفراسٹرکچر ڈویلپمنٹ ءِ وخت اس کہ سوشل اکنامک ڈویلپمنٹ ہراکہ سی پیک نا تہہ ٹی نن چائنا نا کمک اٹ پوسکن ءُ چیپٹر اسے نا بناءِ کرینن ہراٹی توانائی، کشت وکشار، دیر و ورناتے کسبکار کننگ نا ڈٹ آتے ٹی بلوچستان نا بشخ غٹ آن زیات مریک، بنجائی وزیر ڈٹ بندی و شونداری مخدوم خسرو بختیار پارے کہ مون نا حکومت نا مالی مشکل آتیان پد ہم ہراننے میرات اٹی ملانو بلوچستان ءِ شونداری ڈٹ آتے ٹی بھلو بشخ اس ایتنہ، مخدوم خسرو بختیار پارے کہ وزیراعلیٰ جام کمال پارینے کہ بلوچستان نا دہ ضلع ہندن ءُ ہرافتے ٹی تدوک آ کیہی سال آن بنجائی و صوبائی حکومت آک اسہ ہم شونداری ڈٹ اسے نا بناءِ کتنو انتئے کہ مون نا حکومت آک بیرہ سیاسی بنداو تیا شونداری ڈٹ جوڑ کریر ولے وزیراعلیٰ جام کمال خان تینا اولیت آتے سیاست آن جتا کرسا تینا ویژن و حکمت عملی اس پک کرینے، بنجائی وزیر باوری کرفے کہ ساڑی مالی سال اٹی بنجائی حکومت ہراکہ پوسکن آ شونداری ڈٹ آتا بناءِ کیک اوفتے ٹی غٹ آن زیات بشخ بلوچستان نا مریک ۔ اسہ سوج اسے نا ورندی ٹی بنجائی وزیر ڈٹ بندی و شونداری مخدوم خسرو بختیار پارینے کہ مستین اٹی بنجائی پی ایس ڈی پی ٹی بلوچستان نا اسکیم آتون مسخرہ اس کننگا و گیشتر ڈٹ آتے سیاسی بنداو و پسند و ناپسند نا بنداو آ تخنگا ولے وزیراعظم عمران خان نا کماشی ٹی بنجائی حکومت بلوچستان نا تہہ ٹی حقی وڑاٹ کیہی میگا پروجیکٹ آتا بناءِ کیک۔داوخت آ وزیراعلیٰ بلوچستان جام کمال خان پارے کہ مستین اٹی بنجائی پی ایس ڈی پی ٹی بلوچستان کن بیرہ پڑو آتے کننگا و سی پیک کون آ اہم انگا ڈٹ آتا دیکی روٹ انا تختی تے خلنگا و بھلا پڑو آتے کننگا ولے راستکی دانا برعکس ءُ و تدوک آ پی ایس ڈی پی ٹی سی پیک نا دیکی روٹ انا وجود ہم اف، اوپارے کہ مستین اٹی بلوچستان نا فیصلہ غاک بند کمرہ غاتے ٹی مسرہ ۔ جام کمال خان پارے کہ مستین اٹی جندی پسند و ناپسند و سلاہ ئی وڑوڈول نا منظوری آن بیدس کوئٹہ فٹ فیڈر کینال و کوئٹہ ماس ٹرانزٹ ٹرین نا ڈٹ آتا پڑو آتے کننگا ہرافتا فزیبلیٹی اسٹڈی ہم پورو الوکہ ولے ننا حکومت اجتماعی اسکیم تے فوقیت ترسا ڈیمز، روڈ سیکٹرو ایلو سیکٹر آتیا چکار کرینے ہرافتے ٹی ننے بنجائی حکومت نا پورو کمک دوئی ءِ و ساڑی آ منہ تُو تا تہہ ٹی کشت وکشار ، نیشنل ہائی وے اتھارٹی ، توانائی و ایلو محکمہ غاتا بڑزکو کمامدارآک کوئٹہ نا وقتا فوقتا چندی دورہ غاتے کرینو، اوپارے کہ صوبائی حکومت اولیکو وار کوئٹہ نا بھلا آبادی ءِ کوئٹہ میٹرو پولیٹن کارپوریشن نا بشخ اس کرینے و داسہ منہ خاص حلقہ غاتے ٹی شونداری کاریم مننگ نا جاگہ غا کوئٹہ پیکج نا رداٹ اجتماعی اسکیم تے اہمیت تننگک۔
