اسلام آباد۔ 25مارچ(اے پی پی) صدر مملکت ڈاکٹر عارف علوی پارینے کہ پاکستان اسہ واکدار ءُ ملک اسے ولے مدام امن نا خواہندار مسنے، پاکستان نا فوج دنیا نا سوگوانگا ، آزموندہ کار و منظم ءُ فوج اسے، ملک انا ہر ورنا و سپاہی ملکی دفاع نا جوزہ آن سرشار ءُ ، لمہ وطن نا دفاع کن ہروڑنا قربانی تننگک، دفاع ، کسبی چاہنداری و قومی یکجہتی نا عکاس یوم پاکستان پریڈ جوزہ حب الوطنی ءِ پین تالان کرینے۔ اوداہیت ءِ دوشنبے نادے آ داڑے یوم پاکستان پریڈ نا منتظمین آتے ٹی ایوارڈ آتا بشخ وپانٹ نا دود آن تران کرسا پارے۔ صدر مملکت پارے کہ یوم پاکستان پریڈ دنیا ءِ کلہو ایتک کہ بلاشبہ پاکستان اسہ واکدار ءُ قوم اسے و لمہ وطن نا دفاع کن ہروڑنا قربانی ایتک، پاکستان نا ہر ورنا و سپاہی ملکی دفاع نا جوزہ آن سرشار ءُ۔ اوپاکستان نا سلہہ بند فوج ءِ خراج تحسین پیش کرسا پارے کہ سلہہ بند فوج ہر مشکل ساہت اٹی پاکستان نا بیرک ءِ بڑزاتخانو، پاکستانی قوم خاص کر سلہہ بند فوج دہشت گردی تون مقابلہ نا بابت دنیا کن اسہ جتا ءُ مثال اس کرے۔ نن دہشت گردی نا برخلاف جنگ اٹی بے پناہ قربانی تسن و بھاز انگا گڑا تے ہیل کرینن۔ اوپارے کہ پاکستان نا فوج دنیا نا سوگو انگا، آزموندہ کار و منظم ءُ فوج اسے۔ صدر مملکت پاک بھارت ساڑی آ بے چیٹی تا حوالہ ءِ ترساپارے کہ پلوامہ واقعہ غان پد پاکستان آ غلط دوبہ خلنگا ولے پاکستان زمواری نا درشانی ءِ کرے۔ نن دشمن ءِ پیدوار کلہو تسن کہ جارحیت کننگپ، اگہ غلط ءُ گام گیج اس چست کننگا تو اونا پبی ورندی ءِ ایتنہ و ہراتم بھارت ننا چاگڑدی سیم تا خلاف ورزی ءِ کرے تو نن اونا پبی ورندی ءِ تسن۔ اوپارے کہ سیم اناایلو کنڈ جنگ انا توارک ئسر وخت اس کہ نن دنیا ءِ امن نا کلہو ءِ تسن۔ اوپارے کہ قوم اکن دا گمر نا سوب ءِ کہ پاکستان طاقت ہم تخک و امن نا خواہندار ہم ارے۔ ہندا مدام ننا طاقت مریک۔ صدر مملکت پارے کہ اینو نن پوسکن ءُ دور اسے آن گدرینگ انگ اُن ، ایماندار و دیانت دار کماشی ساڑی ءِ۔ داوخت آ صدر مملکت خلیفہ راشد حضرت عمر بن خطاب نا زمانہ خلافت نا اسہ فتح سے نا حوالہ ءِ ترسا پارے کہ علاقہ فتح مننگ تون اوار اوار مال غنیمت ہم بس، اگہ کس ءِ خیسن نا خشت اس ہم ملا تو اواودے مال غنیمت اٹ جمع کرفے۔ داوخت آ حضرت عمر نا خن تیان خڑینک آک بسر و و اودے واقعہ نا بارواٹ پارے ہراڑا حضرت علی پارے کہ دا اوفتا آخا نا ایمانداری ءِ۔ صدرپارے کہ سلہہ بند فوج بابائے قوم انا قول آتا پیروی ءِ کرسا مدام قوم انا است خواہی تیا پورو سلیسونے۔ صدر مملکت ڈاکٹر عارف علوی یوم پاکستان آ سرسہب پریڈ انا اڈتننگ آپاکستان نا سلہہ بند فوج ، نیم فوجی دستہ و سول انتظامیہ ءِ دلی مبارکباد پیش کرسا پارینے کہ دا پریڈ دفاعی و کسبی چاہندار ی نا ولولہ انگیز و شاندار مظاہرہ ئس ہرافتیا مچ آ قوم ءِ گمر ءِ۔ اوخاص کر دوست ملک سعودی عرب، آذربائیجان، سری لنکا، برونائی، بحرین ، ترکی و چین نا پریڈ اٹی اوار مننگ نا ستاءِ کرسا اوفتا منت واری ءِ ہرفے۔ اوپارے کہ پریڈ اٹی جتا فلوٹ آک خوبصورت وڑاٹ پاکستان نا دودوربیدگ نا درشانی ءِ کریر و دا قومی یکجہتی نا است چکوک مظاہرہ ئس ہراڑان جوزہ حب الوطنی پین تالان مس۔ داکان مست صدر مملکت یوم پاکستان پریڈ نا منتظمین آتے ٹی ایوارڈ ہم بشخ وپانٹ کرے۔
