اسلام آباد۔ 25 مارچ(اے پی پی) پاکستان و یورپی یونین نا نیام اٹ معاشی و راجی بشخ آتے ٹی تعلقداری تے مون آ دننگ و سٹریٹجک تعلقداری تیا امنا کننگانے وخت اس کہ یورپی یونین پاکستان نا حکومتی اولیت آتا پورو مخ تفی نا پڑو ءِ کرسا نیزگاری نا چٹفنگ اٹ کمکاری نا باوری کرفینے، انتہاپسندی و دہشت گردی نا برخلاف پاکستانی گام گیج آتا مخ تفی و بھارت تون بے چیٹ حالیت آتے ٹی پاکستان نا کڑد انا ستاءِ کرینے۔ دوشنبے نادے آ پاکستان و یورپی یونین نا نیام اٹ اسلام آباد اٹی تزویراتی مذاکرات مس ہراٹی یورپی یونین ڈل انا سرکڑدہ ہی ءِ امور کارجہ نا سروک فیڈریکا مورگینی وخت اس کہ پاکستان نا سرکڑدہ ہی ءِ وزیر خارجہ شاہ محمود قریشی کرے۔ مذاکرات اٹی کثیر الجہتی ہڑتوم آ کنڈآتا تعلقداری ، ڈیہہ ٹی امن وایمنی نا حالیت آتون اوار اہم علاقائی و جہانی معاملہ غاتیا گپ و تران کننگا۔ کڑدہ غاک پاکستان و یورپی یونین نا نیام اٹ ساڑی آ ہڑتوم آ کنڈآتا تعلقداری تا نوعیت آ است جمی نا درشانی ءِ کریر۔ کڑدہ غاتا نیام اٹ واپار ، زرکاری، دیر پا شونداری، توانائی نا بشخ آتے ٹی ہڑتوم آ کنڈآتا سٹریٹجک شریداری آ امنا کننگا۔ اوکان پد وزارت خارجہ ٹی اسیجا نیوز کانفرنس آن تران کرسا وزیر خارجہ شاہ محمود قریشی پارے کہ فیڈریکا مورگینی تون بے کچ مثبت و فائدہ مند گپ و تران مس، تین پہ تینی تعلقداری و کمکاری ءِ مون آ دننگ آہم گپ و تران کننگا، یورپی یونین تون واپار، زرکاری، گورننس و کانودی معاملہ غاتیا گپ و تران مس۔ یورپی یونین و تحریک انصاف نا حکومت نا پالیسی تیٹی مماثلت ءِ۔ اوپارے کہ مذاکرات اٹی پاکستان یورپی یونین کمکاری ءِ مون آ دننگ آ ہیت مس۔ یورپی یونین تون نیشنل ایکشن پلان، انتہاپسند و چندی بشخ آتے ٹی اواری اٹ کاریم کننگ آ گپ و تران مس۔ مذاکرات اٹی اوغانستان امن عمل نا بابت ہم گپ و تران مس۔ وزیر خارجہ پارے کہ یورپی یونین ءِ اوغان امن عمل اٹ پاکستان نا کڑد آن معلومدار کرین۔ یورپی یونین تون بھارت تون ساڑی حالیت آتیا ہم گپ و تران مس۔ اوپارے کہ بھارت تون غٹ ایسر نا چاری معاملہ غاک بیرہ مذاکرات اٹ ایسر مننگ کیرہ۔ پاک بھارت جنگ آن ہچ ءُ ویل اس ایسر مفک۔ پاکستان بھارت تون بے چیٹی تیٹی کمتی کن گام گیج کرے۔ شاہ محمود قریشی پارے کہ یورپی یونین آن ویزہ، سیل و سوات و ایلو معاملہ غاتیا ہم گپ و تران مس۔ وزیر خارجہ پارے کہ پڑوسی ملک ایران تون تعلقداری پاکستان کن اہم ءِ۔ اوپارے کہ یورپی یونین ملک آتیان برآمد آتے ٹی ودکی و واپار ودنگ ءِ، یورپی یونین نا کنڈآن تروک آ رعایت آتیان پبی فائدہ ہرفنگ نا گرج ءِ ۔ اوپارے کہ حکومت برآمد آتا مون آ دننگ و واپاری نسخان اٹی کمتی کن پرعزم ءِ۔ جی ایس پی پلس سٹیٹس ملنگ آن پاکستان نا برآمد آک دگنا مسر۔ اوپارے کہ دنیا ٹی اسلاموفوبیا نا تالان مننگ بے کچ گڑتی اسے، نیوزی لینڈ واقعہ ٹی 9 پاکستان ہم شہید مسر، نیوزی لینڈ واقعہ غا اونا وزیراعظم نا گام گیج آک ستاکڑزرہ۔ اوثابت کرے کہ مشکل حالیت آتون ہمہ مون تننگک۔داوخت آ یورپی یونین نا امور خارجہ نا سروک فیڈریکا مورگینی پارے کہ پاکستان اٹی بیا بخیر و مثبت گپ و تران آ خوشی ءِ، پاکستان و یورپی یونین نا سٹریٹجک مذاکرات نا دا چارمیکو دور ئس، پاکستان تون چندی بشخ آتے ٹی کمکاری آ امنا مس، معاہدہ غا دستخط کن وزیرخارجہ شاہ محمود قریشی نا برسلز آ بننگ آ خیرمقدم ءِ کینہ۔ اوپارے کہ نیزگاری نا چٹفنگ و ایلو حکومتی اولیت آتے ٹی پاکستان تون کمک کینہ، پاکستان ءِ یورپی مارکیٹ آتے ٹی ہروڑرسینگ فراوان کننگ اُن، پاکستان نا حکومتی اولیت آتا پورو مخ تفی ءِ کینہ۔ اوپارے کہ پاکستان نا کنڈآن بھلو کچ اسے ٹی اوغان باہوٹ آتے تدوک آ کیہی دہائی تیان پانہ تننگ ستاکڑزک۔ بھارت تون بے چیٹ حالیت آتے ٹی کمتی کن پاکستان نا کڑد ستاء کڑزک، پاکستان علاقائی امن و سوگوی کن دہشت گردی نا برخلاف گام گیج کرے۔ اوپارے کہ یورپی یونین انتہاپسندی و دہشت گردی نا برخلاف پاکستانی گام گیج آتا مخ تفی ءِ کیک۔ نیوزی لینڈ واقعہ ٹی تپاخت کروک پاکستانی تا خاہوت آتون ہمدردی ءِ ، دنیا ٹی ہراکہ جاگہ مرے عبادت گاہ تیا جلہو کننگ بے کچ قابل افسوز ءِ، دنیا ٹی اسلامو فوبیا نا تالان مننگ غٹ اکن گڑتی اسے، غٹ راج آتے دا گڑتی تیان بچفنگ کن گام گیج آتا گرج ءِ۔ اوپارے کہ یورپی یونین ترکی ٹی مروک آ ساڑی آ او آئی سی دیوان اٹی ہم اسلاموفوبیا غا ہیت کرین۔ اسلاموفوبیا تون اوار ہر مذہب آجلہو ناقابل برداشتءِ ، دنیا ٹی ہچ کس ءِ حق اف کہ مذہب اسے تون تعلق تخوک آتے نسخان ایتے، یورپی یونین دنیا ٹی مثبت قدر انا مون آ دننگ کن پرعزم ءِ۔
