اسلام آباد۔ 25مارچ(اے پی پی) اسپیکر قومی اسمبلی اسد قیصر تون صدر آزاد کشمیر سردار محمد مسعود خان پارلیمنٹ ہاؤس اٹی اوڑدہی کرے۔ اوڑدہی ٹی مقبوضہ کشمیر نا ساڑی آحالیت، علاقائی سلامتی و تین پہ تینی است خواہی نا ایلو معاملہ غاتیا گپ و تران مس۔ قومی اسمبلی نا اسپیکر اسد قیصر داوخت آپارے کہ کشمیر پاکستان نا شہ رگ ءِ و پاکستان وخت اس ہم داڑان لاپرواہ مننگ کپک۔ اوپارے کہ پلوامہ جلہو مقبوضہ وادی ٹی بھارت نا جارحیت آ مبنی پالیسی تا بھرم ءِ۔ پاکستانی الس و حکومت کشمیر الس تون پورو یکجہتی تخرہ۔ اسپیکر اسد قیصر پارے کہ کشمیر اٹی مروک آ بیدادی نا ترندی اٹ مذمت ءِ کینہ۔ اوپارے کہ کشمیر نا ویل اقوام متحدہ نا قرارداد آتے مون آ تخسا ایسر کننگے۔ دنیا مقبوضہ کشمیر اٹی انسانی حق آتا لتاڑ و کشمیری الس نا لس خون نا نوٹس ءِ ہلے۔ بھارت کشمیر نا ویل آن چکار ءِ اسہ کنڈ کننگ کن دن انگا چم آتے کاریم اٹ اتنگ ءِ۔ کشمیر نا ویل انا ایسری آن بیدس ڈیہہ ٹی امن مننگ کپک۔ کشمیری الس ءِ حق خودارادیت و اوفتے آجوئی اٹ زند ءِ تدیفنگ نا بایدے موقع تننگے۔ اوپارے کہ مودی سرکار گچین کاری تیان مست لین آف کنٹرول آ رزاک اٹ حالیت آتے خراب کننگ خواہک۔ پاکستان بھارت نا کنڈآن حریت راہشون تا دزگیری نا مذمت ءِ کیک۔ داوخت آصدر آزاد کشمیر سردار محمد مسعود خان پارے کہ آزاد کشمیر نا الس پورو وڑاٹ مقبوضہ وادی نا الس تون سلوک ءِ و اوفتے تون مروک آ بیدادی آ ترند انگا لوز آتے ٹی مذمت ءِ کیک۔ کشمیری الس نا مزل پاکستان ءِ و پاکستان ہی مریک۔ اوپارے کہ بھارت اقوام متحدہ نا قرارداد آتا رداٹ کشمیر نا ویل ءِ ایسر کے و کودک کشمیری تیا بیدادی ءِ دمدستی بند کے۔ اوپارے کہ ملکی سالمیت و بقاء کن مچ آ قوم یکجاءِ و ہر جارحیت نا پبی ورندی ءِ تننگ نا لائخی تخک۔
