عمران خان داہیت انا تینٹ اعتراف ئِ کرینے کہ او دوبئی آن 2ملین ڈالر چندہ ہلک و داسہ ہندا ہیت آ او الیکشن کمیشن اٹی اختہ مسنے
مسلم لیگ (ن) نا راہشون دانیال عزیز نا سپریم کورٹ نا پیشن میڈیا تون ہیت وگپ
اسلام آباد۔ 23جنوری (اے پی پی) مسلم لیگ (ن) نا راہشون دانیال عزیز پارینے کہ عمران خان داہیت انا تینٹ اعتراف ئِ کرینے کہ او دوبئی آن 2ملین ڈالر چندہ ہلک و داسہ ہندا ہیت آ او الیکشن کمیشن اٹی اختہ مسنے ، خلیپئے داسہ اونا پٹنگ نا بناءمسنے۔ سپریم کورٹ نا پیشن میڈیا تون ہیت وگپ کرسا اوپارے کہ پیشن آن پیسہ اتسا ملک اٹی سیاست کننگ غیر کانودی ئِ۔ عمران خان جلسہ و لاک ڈاﺅن دھرنہ غاتیان عدالت ئِ زہمی کننگ خوائک۔ اوپارے کہ عمران خان کرپشن نا برخلاف جعلی و بے بنداو دوبہ خلسا سیاست ئِ چمکائفنگ نا کوشست اٹی لگوک ئِ۔ اوپارے کہ عمران خان داہیت انا تینٹ اعتراف ئِ کرینے کہ او دوبئی آن 2ملین ڈالر چندہ ہلک و داسہ ہندا ہیت آ او الیکشن کمیشن اٹی اختہ مسنے ہرانا اودے شاہدی ئِ پیش کروئی مریک۔ مسلم لیگ نا راہشون پارے کہ عمران خان دُزی کرینے تو خلیپئے داسہ اودے پٹنگ انگک۔ دانیال عزیز پارے کہ نن سیاست دان اُن، نن مچ آ زند گیند انا رند اٹ دُدینگ تون بلکن نن سیاست ئِ عبادت سرپند کینہ۔ اوپارے کہ عمران خان مہالو نجم سیٹھی آ دوبہ خلک و الیکشن کمیشن اٹی معافی خواہس و سیاسی بیان پارسا داسہ نرنگ نا کوشست کرے۔ دانیال عزیز پارے کہ نعیم الحق مون آ برے و پائے کہ انت اکن عدالت آن نروک ئِ۔ اوپارے کہ نن نروک ئُ افن نئے پلوک ئُ، نن تینے احتساب کن پیش کرینن و انشاءاللہ سرسہب مرینہ۔ اوپارے کہ عمران خان ملک اٹی گالم گلوچ و تضحیک نا دودوربیدہ نا بنائِ کرینے و دوبہ غاتے ایلو جماعت آتیان خلیک۔ اوپارے کہ عمران خان نا برخلاف اینو الیکشن کمیشن اٹی توہین عدالت نا کیس انا بناءمسنے۔
