کوئٹہ۔ 22مارچ(اے پی پی) صوبائی وزیر داخلہ میر ضیاء اللہ لانگو یوم پاکستان نا وخت آ تینا اسہ کلہو اسے ٹی پارینے کہ ہفتاد ءُ نہہ (79) سال مست اینو نا دے قائد اعظم محمد علی جناح نا راہشونی ٹی برصغیر نا مسلمان راہشونک اسہ آجو ملک پاکستان نا خواست ءِ کریر ہراڑے برصغیر نا مسلمان تے ہر وڑنا راجی ، معاشرتی ، مذہبی و معاشرتی آجوئی دوئی مننگ کے۔ صوبائی وزیر داخلہ پارے کہ 23مارچ نا دے تجدید عہد نادے ءِ ہراننے یکجہتی ، اخوت، سیوت و امن و آشتی نا سبخ ءِ ایتک و دا کہ نن غٹ اواری اٹ مملکت خداداد پاکستان ءِ شون ہلوک و پرامن ملک آتا صف اٹی اتسا سلفنگ کین۔ صوبائی وزیر پارے کہ پاکستان ءِ اللہ تعالیٰ داغٹ خوبی تے تسنے کہ ہرافتا سوب پاکستان اسہ جہانی سیاسی و معاشی واک اس مرسا مون آ بننگ کے۔ اوپارے کہ اینو ملک تدوک آ سیاسی راہشون تا ناعاقبت اندیش فیصلہ غاتا سوب ہندن آن ہندن ویل آتا گواچی ءِ ولے ساڑی صوبائی حکومت وزیراعلیٰ بلوچستان جام کمال خان عالیانی نا کماشی ٹی بنجائی حکومت تون اواری اٹ نئے بیرہ بلوچستان بلکن مملکت خداداد پاکستان ءِ شونداری نا کسر آ روان کننگ نا عہد کرینے۔
