اسلام آباد۔ 22مارچ(اے پی پی) ملائیشیا نا وزیراعظم مہاتیر محمد پارینے کہ نن پاکستان تون بیرہ گچین تعلقداری خواپنہ بلکن ہڑتوم آ ملک آتا نیام اٹ واپار و صنعت ءِ شون تننگ نا خواہندار اُن، معاشی شونداری کن امن و ایمنی و صنعتی شونداری المی ءِ، پاکستان تون ٹیکنالوجی و چاہنداری نا تبادلہ ءِ کینہ۔ او جمعہ نادے آ پاکستان ملائیشیا زرکاری کانفرنس آن تران کریکہ۔ داوخت آ وزیراعظم عمران خان ہم تران کرے۔ ڈاکٹر مہاتیر محمد پارے کہ اودے کاروباری بندغ آتون اوڑدہی و اوفتے تون مخاطب مننگ آ خوشی ءِ۔ نن پاکستان تون بیرہ گچین تعلقداری ہی خواپنہ بلکن ہڑتوم آ کنڈآتا واپار وصنعتی کمکاری ءِ ہم شون تننگ خوانہ۔ اوپارے کہ داکانفرنس نا اڈتننگ آن ہڑتوم آ ملک آتا پوریا گر و زرکارآتے اسہ ایلو ءِ پہہ مننگ ، خیال آتا درشان و شریداری تا قیام نا گمان آتا جاچ ءِ ہلنگ نا موقع ملانے۔ داوخت آ اوملائیشیا نا شونداری نا سفر نا بارواٹ پارسا پارے کہ ملائیشیا اسہ غریب ءُ ملک اس ئس ہرادے صنعت آ چکار کرسا شونداری نا کسر آ روان کننگا۔نن درملکی زرکارآتے ملائیشیا ٹی بننگ نا ترغیب تسن، اوفتے آسراتی و رعایت تسن ہراٹی ملک اٹی پوسکن آ ٹیکنالوجی و زربس، نن صنعت و ٹیکنالوجی ٹی چاہنداری دوئی کرین، تینا مصنوعات آتے تیار کرین، داڑتون اوار اوار امن و سوگوی کن عملی گام گیج کرین و عسکریت پسندی تون اوار چندی ویل آتا مون ءِ توننگ اٹ سرسہب مسن۔ ڈاکٹر مہاتیر محمد پارے کہ دا گام گیج آتا سوب ملائیشیا دا ہند ءِ دوئی کرینے۔ نن شونداری نا پنچ سالہ ڈٹ آتے پورو کرین، خلقت ءِ ہزگار کننگ آ چکار کرین انتئے کہ ہمودروشم اٹ خراج تننگ نا قابل مریرہ ہراتم اوفتے تون سرمایہ برے و ولدا خراج آن دوئی مروک آ زر ءِ الس نا آسراتی آخڑچ کرین و نجی بشخ ءِ مون آ ایسون۔ اوپارے کہ ننے واپار نا گرج ئس و دنیا نا ملک آتا تہہ نا سیاست و نظریات آن قطع نظر اوفتے تون واپاری تعلقداری تے گنڈان۔ اینو ملائیشیا نا غٹ ملک آتون دوستانہ تعلقداری ءِ و اونا ہچ ءُ دشمن اس اف، ولے اسرائیل نا معاملہ جتا ءِ۔ کانفرنس اٹی ہڑتوم آ وزیراعظم تا ساڑی گری ٹی پاکستان و ملائیشیا نا نیام اٹ کارسازی، ٹیلی کام، ٹیکنالوجی و حلال انڈسٹری نا بشخ آتے ٹی مفاہمت نا یات داشت آتیا دستخط کننگا، کانفرنس آن وزیراعظم نا سلاہکار عبدالرزاق داؤد و چیئرمین زرکاری بورڈ ہارون شریف ئسک ہم تران کریر۔
