اسلام آباد ۔ 22 مارچ (اے پی پی) پاکستان ءُُ ایران ءَ کثیرالجہتی تک ءَ دودیمی وت مہ وتی کمک ءَ را پراھی دیگ ءِ ھاترا رھوت ءَ را گیش کنگ ءِ سرا تپاک کتگ۔اے تپاکی دری کارانی وزیر شاہ محمود قریشی ءُُ آئی ءِ ایرانی ہمکار جواد ظریف ءِ میان ءَ جمعہ ءَ استنبول ءِ تہ او آئی سی ءِ اناگتیں دیوانءِ موہ ءِ سرا ھاسیں گند ءُُُ نند ءِ تہ بوتگ۔گند ءُُ نند ءِ تہ پاک ایران سیادی ءُُ دمگ ءِ ھواریں جاورھال ءِ ھوار وت مہ وتی اندوہناکی کارانی سرا ھیال ریچی کنگ بوتگ۔دری کارانی وزیر شاہ محمود قریشی ءَ گوشت کہ ایران ءِ ھوار دمگ ءِ دراھیں ہمساھگیں ملکاں گوں سیادی ءِ تہ گہتری مئے حکومت ءِ دری پالیسی ءِ اولی دلگوشی انت ۔آہاں گوشت کہ مگربی دگنیا ءِ تہ اسلام ءِ ھلاپ ءَگیش بیوکیں جنونیت ءِ ھلاپ ءَ پاکستان ،ایران ءُُ ترکی ءَ را یکجاھیں لاحہ عمل جوڈ کنگ بیت۔ایران ءِ دری کارانی وزیر ءَ گوشت کہ ایران دوئیں ملکانی وت مہ وتی سیادی ءُُ دودیمی کمک ءَ ر اگیش پراھ کنگ ءِ واھگدارانت۔ جواد ظریف ءَ اسلام ءِ ھلاپ ءَ گیش بیوکیں جنونیت ءِ ھوالہ چہ او آئی سی اناگتی دیوان ءِ تہ دری کارانی وزیر شاہ محمود قریشی ءِ نیمگا چہ چست کتگیں پوائنٹس ءِ توسیپ کتگ ءُُ ات درگت ءَ وتی سرجم کمک ءِ سدکی داتگ۔ جواد ظریف ءَ ایران ءِ چار بیگواہ بوتگیں فوجیانی بازیابی ءِ سرا پاک اُردو ءُُ پاکستان ءِ حکومت ءِ ھاسیں منت گپتگ انت۔
