اسلام آباد۔ 22مارچ(اے پی پی) اسپیکر قومی اسمبلی اسد قیصر پارینے کہ پاکستان نا روشن آخبت نا سیبو ورناتا سیاسی پختگی آٹے، ورناتا لائخی تے کاریم اٹ اتسا ملک ءِ مون تروک راجی و اقتصادی ویل آتا مون ءِ توننگ مریک، ورناک ہی ملک اٹی مثبت بدلی اتنگ کیرہ۔ داخیال آتا درشانی ءِ او جمعہ نادے آ ورناسیاستدان تا فیلو شپ پروگرام نا بنائی دود آن تران کرسا کرے۔ اوپارے کہ ورناتا سیاسی پختگی کن سیمینارز، گروپ سٹڈیز، پٹ وپول و سیاسی سرجزآتے ٹی بشخ ہلنگ المی ءِ، جندی فائدہ و سیاسی وابستگی تیان ایڑتر مرسا مزل نا تعین اسہ شونہال و شون پسند پاکستان کن المی ءِ، جندی فائدہ غاتیان ایڑ تر مرسا کاریم کیر تو اللہ تعالیٰ نمے شرف ایتک۔ اوپارے کہ انسان عہدہ غان آخا بلکن تینا کاریم آن بھلو بندغ اس مریک ، ورناک سوگو معاشی پس منظر آن بیدس ہم ملک انا جوڑ جاڑ و شونداری ٹی اسہ فعال ءُ کڑد اس ادا کننگ کیرہ۔ اسد قیصر پارے کہ سیاسی جماعت آک تینا سیاسی سرجزآتے ٹی ورناسیاسی کارندہ غاتے اوار کیر۔ ورناک سیاسی سرجزآتے ٹی پبی بشخ ہلیرو و است انا حب اٹ ملک انا خذمت ءِ کیر ، ورناتا سیاست اٹی است بڈی و تربیت ملک اٹی اسہ باشعور و مخلص سیاسی سرکڑدہ ہی ءِ المی جوڑ کیک۔ اوپارے کہ فیلو شپ پروگرام بایدے آخبتی بنداو تیا اڈتننگے۔ اوپارے کہ پلڈ اٹ نا کنڈآن ملک اٹی جمہوریت نا مون آ دننگ کن کوشست و ورناسیاست دان تے کن فیلو شپ پروگرام اڈتننگ ستاکڑزک۔
