اسلام آباد۔ 22مارچ(اے پی پی) ملائیشیا نا وزیراعظم ڈاکٹر مہاتیر محمد قومی معیشت ءِ نسخان تیان بچفنگ کن پاکستان ءِ انسداد وڈی خوری نا بشخ اٹی کمکاری نا سلہ خلسا پارینے کہ وڈی خوری ملک آتا شونداری نا کسر اٹی بھلو اڑاند اسے، دانا الس نا راجی و اقتصادی شونداری آ منفی زہم تمک۔انسداد وڈی خوری ٹی کمکاری نا دنگ ءِ ایلو مسلم ملک آتسکان ہم ودفنگ مریک۔ جمعہ نادے آ وزیراعظم عمران خان تون اوار وزیراعظم ہاؤس اٹی پریس کانفرنس آن تران کرسا ملائیشیا نا وزیراعظم پارے کہ ملائیشیا ءِ وڈی خوری نا منفی زہم تا بارواٹ بھاز گڑتی ءِ و سمجھک کہ دا راجی و اقتصادی شونداری نا کسر اٹی بھلو اڑاند اسے۔ اوپارے کہ السی عہدیدار آتا کنڈآن دُزوک آ زرآتے بایدے دوئی کروئی مرے و اوفتا رخ ءِ الس نا گچینی کن شونداری بجٹ نا کنڈآ بایدے کننگے۔ اووزیراعظم عمران خان نا دا وژن نا تائیدءِ کرے کہ وڈی خوری ملک ءِ زہمی کرسا اونا الس ءِ نیزگار کیک۔ ڈاکٹر مہاتیر محمد پارے کہ نن انسداد وڈی خوری کن اسہ ایلو ءِ معلومداری تننگ کینہ و ایلو مسلم ملک آتون ہم وڑوڈول ءِ شیئر کننگ مریک تانکہ اوفتے شونداری ءِ المی جوڑ کننگ اٹ کمک رسینگے۔ اوپارے کہ ہڑتوم آ کنڈآتا تعلقداری تیان بیدس وزیراعظم تون مسلم امہ ءِ مون تروک ویل آتیا ہم گپ و تران مس۔ اوپارے کہ کرائسٹ چرچ جلہو اٹی 9 پاکستانی و 3ملائیشین شہید مسر۔ اوپارے کہ ننے انتہاپسندی و اسلاموفوبیا نا چٹفنگ کن اواری اٹ کاریم کروئی مریک۔ دنیا ٹی مسلمان تا برخلاف نکتہ نظر ءِ بدل کننگ کن کوشست آتے کاریم اٹ اتوئی مریک۔ مہاتیر محمد پارے کہ پاکستان نا دورہ ہڑتوم آ ملک آتے کن بے کچ فائدہ مند ءِ۔ اوپارے کہ معیشت و واپار اٹی ودکی کن اواری اٹ کوشست آتے کاریم اٹ اتینہ۔ معاشی شونداری کن جتا ماڈل آتا جاچ المی ءِ۔ تین پہ تینی واپار اٹی ودکی آ ہم گپ وتران مسنے۔ اوپارے کہ پاکستان آ بننگ آ کنے بھاز خوشی مسنے، یوم پاکستان نا دود آتے ٹی بشخ ہلنگ کنکن شرف نا سوب ءِ۔ داوخت آ وزیراعظم عمران خان پارے کہ یوم پاکستان پریڈ اٹی مہمان اعزاز نا حیثیت اٹ بشخ ہلنگ کن ملائیشیائی ہم منصب نا دورہ پاکستان ننکن اسہ اعزاز اسے۔ اوپارے کہ ڈاکٹر مہاتیر محمد اسہ مدبر نا حیثیت اٹ مسلم دنیا کن اسہ رول ماڈل اسے نا حیثیت تخک ہراتینا ملک انا الس نا زند انا آب ءِ بڑزکرے۔ سیاست اٹی اونا پدی بننگ وڈی خوری نا چٹفنگ نا بابت اسہ شاندار ءُ گام اسے۔ وڈی خوری نا برخلاف اونا موقف ستاکڑزک۔ اوپارے کہ پاکستان مسلم دنیا ءِ مون تروک ویل آتا بارواٹ ڈاکٹر مہاتیر محمد نا جیرت مندانہ موقف آ اونا مداح ءِ۔ اوخاص کر اسلاموفوبیا نا چیلنج آتون مون تننگ نا ساڑی چاگڑد نا رداٹ اونا فعال کڑد آ زور شاغا۔ وزیراعظم عمران خان پاک ملائیشیا برادرانہ تعلقداری تے تالان کرسا پارے کہ گپ و تران اٹی ہڑتوم آ ملک آتا نیام اٹ براہ راست زرکاری تون اوار چندی بشخ آتے ٹی کمکاری آ گپ و تران مس۔ وزیراعظم عمران خان و اونا ملائیشیائی ہم منصب ڈاکٹر مہاتیر محمد ہراداکان مست ون آن ون اوڑدہی کریر، ہڑتوم آ کنڈآتا تعلقداری تے تینا الس نا فائدہ غاتے ٹی شاغنگ نا عزم انا درشانی ءِ کریر۔ ڈاکٹر مہاتیر محمد گپ و تران ءِ بھاز ٹھوس و فائدہ مند گوندسا پارے کہ اودے پاکستان و ملائیشیا نا نیام اٹ سنگتی نا احیاآ خوشی ءِ۔ او ہندن انگا بشخ آتا پیدواری نا گرج آ زور شاغا ہراڑے ہڑتوم آ ملک آک واپار و بجلی نا پیدوار تون اوار وارخواہی پٹنگ کیرہ۔ ڈاکٹر مہاتیر محمد پارے کہ ہر ملک اکن دا المی ءِ کہ اوڑتون بحیثیت قوم امور کار نا جوانی اٹ انجام تننگ کن جوان ءُ دولت اس مرے و اونا جہانی کہول آ ٹھوس ہند اس ہم مرے۔ اومسلم ملک آتیا زور شاغا کہ او شونداری کن کوشست کیر۔ اوپارے کہ ملائیشیا شونداری نا 2025ء نا ہدف آتا دوئی کننگ کن تینا توانائی تے مجتمع کرینے۔ مہاتیر محمد پارے کہ او عمران خان تون دہشت گردی نا ویل آ ہم گپ و تران و منفی ذہنیت نا انسداد کن تین پہ تینی کمکاری آ زور شاغا۔ اوداپت انا درشانی ءِ کرے کہ اونا دورہ غان ہڑتوم آ کنڈآتا واپار و زرکاری ءِ گچین کننگ کن ہڑتوم آ حکومت آتے کمک رسینگک و داٹی معیشت سوگو مریک۔ براہ راست درملکی زرکاری نابارواٹ اوہڑتوم آ ملک آتا قاعدہ و عوامل کار آن جوان آگاہی آ زور شاغاوپارے کہ ہراڑے مننگ کرے زرکاری نا است بڈی کن اسیجا ضابطہ اس جوڑ کننگے۔ 21می صدی نا معیشت نا حامل سیاست نا اہمیت آ زور شاغسا اوپارے کہ ملائیشیا جاپان و ایلو شون ہلوک دے ٹکی ملک آتا کنڈا ہرسا گڑاس سرسہبی دوئی کرے، اونا ملک تعلقدار بشخ آتے ٹی پاکستان تون کمک کن تیار ءِ۔ وزیراعظم عمران خان پارے کہ ملائیشیا ءِ شونداری نا ماڈل نا حیثیت اٹ ہلسا اونا حکومت اقتدار ءِ سنبھالنگ آن منہ وخت پد براہ راست درملکی زرکاری و ٹیکنالوجی نا بشخ اٹی شونداری آ چکار کرے۔ سیل و سوات نا بشخ اٹی اشتراک کار نا بارواٹ اسہ سوج اسے نا ورندی ٹی وزیراعظم پارے کہ پاکستان ملائیشیاغان بھاز ہیل کننگ کیک ہرا دا بشخ آن کم و ود 22 ارب ڈالر کٹیا کننگ ءِ۔اوپارے کہ پاکستان ءِ قدرتی وسیلہ و سیل و سواتی جاگہ غاتیان مالامال ملک اسے و دا بشخ ءِ مون آ درسا خاطرخواہ زرمبادلہ کٹنا کننگ مریک۔
