نیویارک۔ 22مارچ(اے پی پی) اقوام متحدہ ٹی پاکستان نا آخبتی مندوب ڈاکٹر ملیحہ لودھی پارینے کہ وزیراعظم عمران خان نا کماشی ٹی پاکستان شونہالی نا کسرآ روان مسنے۔ او اقوام متحدہ ٹی پاکستانی مشن نا کنڈآن یوم پاکستان نا بابت رنگ رنگی آ بیابخیری دود آن تران کریکہ۔ دود اٹی اقوام متحدہ نا مسہ انڈر سیکرٹری جنرل، جنرل اسمبلی نا متوقع صدر اقوام متحدہ ٹی نائیجیریا نا سفیر پروفیسر تجانی محمد بندے، کیہی ملک آتا سفارتکار ، صحافی و امریکہ ٹی رہینگوک آ پاکستانیک بھلو کچ اسے ٹی بشخ ہلکر۔ ڈاکٹر ملیحہ لودھی پارے کہ اینو پاکستان پراومیت و پر اعتماد ءِ۔ ساڑی ہی ٹی جاری مروک آ اسہ جہانی سروے سے نا رداٹ پاکستان نا شمار مچ آ دنیا ٹی غٹ آن زیات خوش رہینگوک آ قوم تیٹی مریک، ہرا ننا قوم انا واک و سگ انا اعتراف ءِ۔ پاکستان نا ساڑی حکومت الس اٹی آخبت نا شونداری و شونہالی نا بے پناہ و بھاز بھلو اومیت ودی کرینے۔ پاکستان کثیر مذہبی و دودوربیدگی راج انا تصور تون پورو وابستگی تخک و دادے مون آ دننگ کن جہانی کہول آ قائدانہ کڑد ءِ برجاتخک۔ پاکستان اقوام متحدہ نا امن مشن تیکن افرادی واک نا فراوانی و نظریاتی مخ تفی ءِ برجاتخک۔ داوخت آ اقوام متحدہ کن پاکستانی نرینہ و نیاڑی تا خذمت آتے عکس آتا کمک اٹ تالان کننگا۔ ڈاکٹر ملیحہ لودھی داوخت آ چندی ملک آتا مندوبین آتون اوار د ل دل پاکستان نا روح پروردھن اٹی کیک اس کاٹ کریر۔
