اسلام آباد۔ 22مارچ(اے پی پی) صدر مملکت ڈاکٹر عارف علوی پارینے کہ پاکستان اسہ پرامن و وتواجہ ءُ ملک اسے ہرا غٹ ہمسایہ غاتون گچین تعلقداری گنڈنگ نا خواہندار ءِ۔ اوداہیت ءِ آذربائیجان نا وزیر دفاع کرنل ذاکر حسنوف اصغر اولو تون گپ و تران کرسا پارے ہرا جمعہ نادے آ ایوان صدر اٹی اوڑتون اوڑدہی کرے۔ صدر پارے کہ پاکستان تینا علاقائی سالمیت نا نہاد آ آخا بلکن تین پہ تینی است خواہی نا غٹ تر معاملہ غاتیا بھارت تون اوار غٹ ملک آتون گپ و تران آ باور کیک۔ ننا است خواہی ءِ کہ غٹ دوست ملک آک بھارت آ زور شاغر کہ او اقوام متحدہ سلامتی کونسل نا قرارداد آتار داٹ کشمیر نا جھیڑہ نا پرامن ایسری کن پاکستان تون ہیت وگپ کے۔ اوپارے کہ پاکستان آذربائیجان تون تینا برادرانہ تعلقداری تے بھاز اہمیت ایتک۔ صدر یکم مارچ 2017ء آ اسلام آباد اٹی اڈ ہلوک آ 13می ای سی او سمٹ اٹی صدر الہام علیوف نا بشخ ہلنگ نا ستاءِ کرسا ہڑتوم آ کنڈآتا برادرانہ تعلقداری تے تالان کرے۔ اوجموں کشمیر نا ویل آ آذربائیجان نا پدریسہ مخ تفی نا ہم ستاءِ کرے۔ صدر پارے کہ ننا ہڑتوم آ کنڈآتا اقتصادی تعلقداری ساڑی آ لائخی تون ہم گرنچ افس، تین پہ تینی واپار نا کچ اٹی ودکی نا گرج ءِ ۔ ڈاکٹر عارف علوی کشت وکشار ، مینو فیکچرنگ ، خذمت آتا بشخ، ازباب جراحی تون اوار کیہی بشخ آتے ٹی واپار اٹی ودکی و تین پہ تینی کمکاری نا گمان آتے پٹنگ نا گرج ءِ ہم تالان کرے۔ اوپارے کہ پاکستان نا کنڈآن ویزا نظام اٹی آسانی ودی کننگ آن آذربائیجان آن سیل و سواتی و کاروباری بندغ آتا کچ اٹی ودکی مریک۔ صدر ہڑتوم آ ملک آتا نیام اٹ دفاعی کمکاری نا لائخی و سلہہ بند فوج انا نیام اٹ عسکری تربیت ءِ ہم تالان کرے۔ اوپارے کہ پاکستان پاک اوغان سیم آ لس خلقت نا کانودی سفر اٹی آسراتی ودی کرسا گچین ءُ بارڈر کنٹرول نا نظام اس ہم نصب کرینے۔ اوپارے کہ مچ آ ڈیہہ ءِ اوغانستان نا اول سرآن جوڑ جاڑ و بحالی ٹی تینا کڑد ءِ ادا کننگ نا گرج ءِ۔ آذربائیجان نا وزیر دفاع پارے کہ پا کستان و آذربائیجان نا نیام اٹ برادرانہ و خوشگوار تعلقداریک گنڈوک ءُ و اومدام اسہ ایلو تون تفینو۔ صدر مملکت یوم پاکستان نا دود آتے ٹی آذربائیجان نا بشخ ہلنگ نا ستاءِ کرسا صدر الہام علیوف ءِ پاکستان نا دورہ ءِ کننگ نا سلہ ہم خلک۔
