اسلام آباد۔ 22مارچ(اے پی پی) وزیراعظم عمران خان و اونا ملائیشیائی ہم منصب ڈاکٹر مہاتیر محمد جمعہ نادے آ وزیراعظم ہاؤس اٹی اوڑدہی کریر ہراٹی ہڑتوم آ ملک آتا نیام اٹ تعلقداری تے پین سوگوی تننگ آ چکار کننگا۔ ہڑتوم آ راہشونک السی کہول آ رابطہ غاتے سوگوی تننگ کن گام گیج چست کننگ تون اوار اوار تینا کاروباری برادری نا اسیجا ڈٹ آتا بناکننگ نا است بڈی ءِ کننگ آ ہم زور شاغار۔ وزیراعظم عمران خان پارے کہ پاکستان و ملائیشیا نا نیام اٹ برادرانہ تعلقداریک گنڈوک ءُ و او آزمائش نا ہر ساہت اٹی اسہ ایلوتون سلیسونو۔ اوڈاکٹر مہاتیر محمد ءِ متاثر کروک ءُ شخصیت اس گوندا ہرانا وژن نا سوب ملائیشیا اسہ شون ہلوک ءُ و پوسکن ءُ ملک اس جوڑ مسنے ۔ داکان پد ہڑتوم آ راہشونک ڈل آتا کہول آ مذاکرات کریر ہراٹی واپار، آٹوموبائل، کشت وکشار ، سیل و سوات، فوڈ پروسیسنگ خاص کر حلال سُواتون اوار چندی بشخ آتے ٹی تین پہ تینی کمکاری نا احاطہ ءِ کننگا۔ پاکستانی ڈل اٹی وزیر خزانہ اسد عمر، وزیر اطلاعات چوہدری فواد حسین، وزیراعظم نا سلاہکار واپار عبدالرزاق داؤد، وزیراعظم نا خصوصی کمکار سمندر پار پاکستانیز ذوالفقار بخاری و خارجہ سیکرٹری تہمینہ جنجوعہ ئسک اوار ئسر۔ وزیر خزانہ اسد عمر صحافی تے پارے کہ ڈل آتا کہول آمذاکرات اٹی ہڑتوم آ کنڈآتا اہمیت نا غٹ تر بشخ خاص کر قومی اقتصادیات ءِ نسخان تیان بچفنگ کن راج اٹی انسداد وڈخوری نا بشخ انا احاطہ ءِ کننگا۔ اوپارے کہ ڈاکٹر مہاتیر محمد وزیراعظم عمران خان ءِ وڈی خوری تون مون تننگ نا بارواٹ اسہ کتاب اس ٹیکی نا وڑاٹ ہم پیش کرے انتئے کہ دا ہڑتوم آ راہشون تا است خواہی نا سرحال ءِ۔ اسد عمر پارے کہ دیوان اٹی پاکستان نا ملائیشیا ءِ اینٹی ٹینک میزائل نا برآمد نا بارواٹی مست آن دستخط مروک معاہدہ غا ترند تر عملدرآمد آ ہم زور شاغنگا۔ اوپارے کہ ملائیشیا ٹی بروک آ ایوی ایشن نمائش اٹی پاکستان نا جے ایف 17 تھنڈر جنگی جہاز آتا درشانی آ ہم امنا کننگا۔ اوپارے کہ پاکستان ملائیشیا تون سیل و سوات نا بشخ اٹی اشتراک کار اٹی ہم است خواہی ظاہر کرے۔
