کوئٹہ۔ 21مارچ(اے پی پی) صوبائی وزیر جان جوڑی میر نصیب اللہ مری تدوک آدے پی پی ایچ آئی نا ضلعی ہسپتال کوہلو و شعبہ ای پی آئی نا دورہ ءِ کرے اورفیق بزدار ءِ ڈی ایس ایم آفیسر پی پی ایچ آئی تعینات کننگ نا پڑو ءِ ہم کرینے و ہسپتال نا ویل آتا جاچ ءِ ہلسا ایسر کننگ نا باوری کرفینے داوخت آ او صحافی تتون گپ و تران کرسا پارے کہ بلوچستان اٹی جان جوڑی نا بشخ گچینی نا کنڈاروان ءِ صوبہ نا چندی ڈویژن ہسپتال آتے ٹی مریض آتا آپریشن ءِ کننگ انگ ءِ ہرا اسہ مثبت ءُ بدلی اسے ۔ بلوچستان اٹی ڈاکٹر و عملہ نا کمتی نا سوب بھرتی تے کنٹریکٹ نا بنداوآ کرینن تانکہ ہسپتال آتے ٹی عملہ نا کمتی مر کننگ کے زوت صوبہ نا منہ سلوک آ ہسپتال آتا دورہ ءِ کرسا ویل آتے ایسر کیوہ کوہلو ٹی ہرابندغ آک پیسہ ہلسا خلقت ءِ بھرتی کننگ نا تغ ءِ خناسر ہمووڑ مفننگ آ واتوڑ کننگ ءُ مستین اٹی محکمہ جان جوڑی نا خورک آسامی تیا بھرتی کننگ کن پیسہ خواہنگا ہراڑا کیہی بندغ آک تینا چناتے بہا کرینو ہراکہ ظلم انا انتہاءِ ، کوہلو نا خوانندہ بے روزگار ورناتے روزگار تسونن ضلع نا ایلو خورک آسامی تیا ہم ٹیسٹ و انٹرویو کرسا زوت میرٹ نا رداٹ خلقت ءِ روزگار ایتیوہ وزیراعظم عمران خان و وزیراعلیٰ جام کمال خان نا خصوصی پارت ءِ کہ خوانندہ ورناتے روزگار تننگے مستین اٹی سیاسی پارٹی تتون اوار کوہلو نا شونداری کاریم تیٹی وڈی خوری کاٹم آن گدرینگادا بابت نیب و اینٹی کرپشن نا ٹیم تے کوہلو نا شونداری کاریم تا معائنہ ءِ کننگ کن نوشتہ کرینن تانکہ الس ءِ معلوم مننگ کے کنا اولیت کوشست ءِ کہ صوبہ تون اوار تینا حلقہ نا الس ءِ بنداوی آسراتی ترسا ہچ کس تون نا انصافی ءِ سگنگ پننگک کوہلو ٹی زوت 15ہزار ہیلتھ کارڈ تننگ انگ ءِ تانکہ نیزگار الس ءِ درمان اٹی آسانی مننگ کے داکان پد صوبائی وزیر پریس کلب کوہلو نا دورہ ءِ کرے و صحافی تتون ملا اوفتے تون اوار ڈپٹی کمشنر کوہلو منوار حسین و ڈسٹرکٹ ہیلتھ آفیسر ڈاکٹر شیرزمان مری ئسک ئسر پریس کلب اٹی صحافی تتون غیر رسمی گپ و تران کرسا میر نصیب اللہ مری پارے کہ کوہلو نا صحافیک مشکل حالیت آتے ٹی السی ویل آتے تالان کرینو صحافیک و پریس کلب نا بنداوی ویل آتے ایسر کننگ کن مست ہم گام گیج کرینن و پین وخت اس ہم ساڑی اُٹ اینو ہم ضلع نا کیہی اہم ویل آک کنے اسکان صحافی تا کمک اٹ سرمریرہ آجوئی صحافت آ باور کیوہ۔
