اسلام آباد۔ 21مارچ(اے پی پی) بنجائی وزیر اطلاعات و نشریات چوہدری فواد حسین پارینے کہ نواز شریف و آصف علی زرداری وڈی خوری نا فصل ءِ داخہ دیر تسنو کہ او داسہ وڈی خور سنگلاخ درخت آنبار مسنے، نواز شریف 300 ارب روپئی وڈی خوری تون جیل اٹی ءِ وخت اس کہ آصف علی زرداری ہم زوت ہنداخہ ہی 300 ارب روپئی نا وڈی خوری نا کیس اٹی جیل اٹی مریک، بلاول بھٹو و مریم نواز نا تینا کٹیا تو اف او تینا لمہ و باوہ نا وڈی خوری نا پیسہ غاتیا سیاست کننگ ءُ، داہڑتوم آتا سیاست ’’ابو بچاؤ‘‘ اسکان محدود ءِ، وزیراعظم عمران خان و پی ٹی آئی وڈی خوری نا دیوال ءِ ہرادِکہ ءِ تسنو داسہ اوڑا وخت اس ہم ماڑی تفنگ مفک، بھارتی عدالت آن سمجھوتہ ایکسپریس کیس اٹی اوار دہشت گرد آتے یلہ کننگ انصاف نا بوزاٹ چپانٹ اسے، سعودی عرب و یو ای اے نا سرکڑدہ غاتیان پد داسہ ملائیشیا نا وزیراعظم پاکستان نا دورہ غا بننگ ءِ، تدوک آ دور انا سیکورٹی ریاست نا ویزہ رجیم ءِ یکسر بدل کرسا دنیا کن پاکستان ءِ ملنگانے، بھارت نا عدالتی سسٹم دہشت گردآتے کن ڈرائی کلینر سسٹم اس مسنے۔ بنجائی وزیر اطلاعات پنچ شنبے نادے آ جہلم اٹی جنگل آتا جہانی دے انا وخت آ ’’پلانٹ فار پنجاب‘‘ نا رداٹ شجرکاری مہم نا بنائی دود آن تران کریکہ۔ کمشنر راولپنڈی جودت ایاز، ڈی سی جہلم سیف انور جپہ، اسٹیشن کمانڈر جہلم، بریگیڈیئر وقار احمد، چیف کنزرویٹر آفیسر جنگلات اطہر شاہ گھگا ، ڈی پی او جہلم، اے ڈی سی جی جنرل جہلم تون اوار ایلو کمامدارآک داوخت آ ساڑی ئسر۔ بنجائی وزیر اطلاعات و نشریات چوہدری فواد حسین داوخت آ نیال اس خلسا شجر کاری مہم نا بناءِ کرے۔ بنجائی وزیر چوہدری فواد حسین پارے کہ اینو جنگلات آتا جہانی دے ءِ دابابت جہلم اٹی غٹ آن بھلا رقبہ جہلم اٹی ءِ ہراڑے درخت خلنگ نا مہم نا بنامسنے، 193ایکڑ جاگہ غا کوزہ مسوسس ضلعی انتظامیہ ءِ مبارکبادی ایتیوہ ہرافک کوزہ ءِ خورک کرفیر داسہ داڑے جنگلات خلنگک۔عمران خان نا کماشی ٹی اولیکو چاگڑد دوست حکومت ءِ ہرانا سوب آن اینو مچ آ پاکستان اٹی چاگڑد نا دوستی ءِ، مون نا حکومت آک درخت آتے وڈی خوری نا گواچی کریر، ’’چھانگا مانگا‘‘ میانوالی نا جنگل آتیا کوزہ کننگا۔ اوپارے کہ نواز شریف و آصف علی اسہ بشخ اسے ہم الیتنو ہرجاگہ غا وڈی خوری کرینو، داسہ آخبت نا اِرالیڈر مریم نواز و بلاول بھٹو مون آ بسنو ، دافتے سیاست نا آزموندہ تو اف، ولے ہڑتوم آتا باوہ نا وڈی خوری ناپیسہ غاک ضرور اریر، داہڑتوم آتا سیاست و تحریک آخبت اٹی ہم ہنداخہ تہار مریک اخس کہ ساڑی ٹی تہار ءِ، ہڑتوم آتا سیاست ابو بچاؤ تحریک ءِ۔ بنجائی وزیر چوہدری فواد حسین پارے کہ بھارت نا عدالت سمجھوتہ ایکسپریس کیس انا غٹ ڈوہدار تے یلہ کرینے دا انصاف نا بوزآ چپانٹ اسے ، بھارتی عدالت آک مہالو ہم ہندن ءُ فیصلہ کریر ہرا دہشت گرد و انتہاپسند آتے رکھ تننگ نا بریبر ءُ۔ اوپارے کہ شجر کاری آخبت نا روشنائی ءِ ، جہلم تاریخی ءُ اہمیت اس تخک، ہراڑے قلعہ جوگی، روہتاس قلعہ، الیگزلنڈر، سکندر اعظم جنگ انا جاگہ و سیل و سواتی جاگہ غاک ءُ داڑے زرکاری کن کوشست کننگ اُن۔ اوپارے کہ محمد بن سلیمان و محمد بن زاہد آن پد داسہ ملائیشیا نا وزیراعظم مہاتیر محمد پاکستان آ بننگ ءِ، اسہ بھلو وخت اسے آن پد پاکستان جہانی راہشون آتے کن ملنگوک ءِ ، نن تینا پالیسی تے یکسر بدل کرینن۔ اوپارے کہ پاکستان اٹی غٹ ادارہ غاک اسہ پنہ غاٹو، و تینا فائدہ غاتے ٹی شدت پسند آتا برخلاف پبی کریک ڈاؤن کننگ انگ ءِ، ہچ کس ءِ موکل تفننگک کہ او پاکستان نا گل زمین ءِ کس اسے نا برخلاف کاریم اٹ اتیر۔ اوپارے کہ نن ملک ءِ مون آ دننگ خوانہ، پاکستان نا آخبت روشناءِ و رکھوک ءِ۔ اوپارے کہ وزیراعظم عمران خان چاگڑد و شارتے زیباکننگ نا ہیت ءِ کیک تو دا پوسکن ءُ ہیت لگرہ انتئے کہ مست ہچ کس دُن ءُ ہیت کتنے۔ اوپارے کہ اِرا خاہوت آتا سیاست وڈی خوری نا سوب آن مچ آ پاکستان شیف بس اِراخاہوت بڑزا ہنارہ ولے داسہ اوفتا احتساب نا وخت بننگ ءِ دابندغ آتا پڈاٹی داخاطران دڑد ءِ او پیشن آ ہِننگ افس۔ بنجائی وزیر چوہدری فواد حسین پارے کہ بروک آ منہ تُو اٹی مریم و بلاول ءِ ہم معلوم مریک کہ اوفتا سیاست ہم چٹانے۔ کمشنر راولپنڈی جودت ایاز پارے کہ ای تینا کیریئر نا بناءِ 21سال مست جہلم آن کریسٹ، کنے دا معلوم تما خوشی مس کہ ریاست نا ڈغارتے نن پدی ہلکونن۔ اوپارے کہ ہراوڑ الس شجر کاری مہم اٹی الس ، چناک و رضاکار آک بشخ ہلنگ ءُ داڑا بھاز خوشی ءِ۔ اوپارے کہ ہر معیشت کن جنگلات آتا رقبہ پنچ می بشخ بایدے مرے، داوخت آ 17 درسد کم ءِ دادے پورو کننگ کن حکومت تون اوار اوار غٹ تپہ غاک بشخ ہلیرہ تو دا ہدف زوت پورو مریک۔ ڈی سی جہلم سیف انور جپہ پارے کہ اینو 35ایکڑ آ 26ہزار نیال خلنگ اُن ، داڑے واٹر ٹربائن خلنگانے تانکہ نیال آتا گچین نشوونما مننگ کے۔ اوپارے کہ بروک آ بشام اٹی ہم شجر کاری نا ہنداوڑانا مہم اس چلیفنگک۔ چیف کنزرویٹر آفیسر عطر شاہ گھگاپارے کہ ضلعی انتظامیہ نا کمک اٹ جہلم اٹی 193ایکڑ ڈغار تا کوزہ ءِ دوئی کننگانے ، ہنداوڑ محکمہ جنگلات اٹک و اسلام آباد اٹی سد آ ایکڑ ڈغارتیا تجاوزات آتے پدی ہلسا ہموڑے شجر کاری نا بناءِ کرینے۔ داکان مست بنجائی وزیر اطلاعات و نشریات چوہدری فواد حسین محکمہ جنگلات، کشت وکشار ، ریسکیو 1122، سٹی ٹریفک پولیس، ضلعی پولیس، سول ڈیفنس ، سوشل ویلفیئر، پاپولیشن ڈیپارٹمنٹ ، لائیو اسٹاک تون اوار ایلو ادارہ غاتا کنڈآن خلوک آ اسٹال آتا ہم دورہ ءِ کرے ہراڑے اوفتے تینا تینا ادارہ غاتا معاملہ غاتا بابت حوال تننگا۔
