اسلام آباد۔ 21مارچ(اے پی پی) ہرسال آنبار داسال ہم 23مارچ یوم پاکستان ءِ روایتی جوش و جوزہ اتون ہفتہ نادے آ اڈتننگک۔ داچرجوئی ٹی غٹ آن بھلا دود پریڈ گرونڈ اسلام آباد اٹی اڈ ہلیک ہرانا اعزازی مہمان ملائیشیا نا وزیراعظم ڈاکٹر مہاتیرمحمد مریک، آذربائیجان نا وزیر دفاع، بحرین نا چیف آف آرمی اسٹاف و عمان نا بڑزکو کمامدارآک ہم مہمان تیٹی اوار ءُ وخت اس کہ صدر مملکت ڈاکٹر عارف علوی ، وزیراعظم عمران خان، بنجائی کابینہ نا باسک آک، ہرمسٹ آ سلہہ بند فوج انا سروک آک، درملکی سفارت کارآتیان بیدس بھلو کچ اسے ٹی مہمانک بشخ ہلیرہ۔ آذربائیجان ، بحرین، چین، سعودی عرب، سری لنکا و ترکی نا چندی دستہ غاک یوم پاکستان پریڈ اٹی بشخ ہلیرہ۔ داوخت آ ہرمسٹ آ سلہہ بند فوج، گرلز گائیڈز، بوائے اسکاؤٹس نا دستہ غاک سلامی ایترہ۔ داکان بیدس ہر چار صوبہ، آزاد کشمیر و گلگت بلتستان نا دودوربیدگ آ مبنی فلوٹس آک ہم پریڈ اٹی اوار مریرہ۔ یوم پاکستان نا پریڈ اٹی پوسکن انگا فوجی سازوسامان، میزائل و دفاعی ازباب آتا نمائش ہم مریک۔ داوخت آ پاک فضائیہ نا شاہین تینا لائخی تا جوہر ءِ نشان ایترہ۔ پریڈ آن پد ملی نغمہ غاتیا شاندار پرفارمنس و پنجاب، سندھ، بلوچستان، خیبر پختونخوا ، گلگت بلتستان و آزاد کشمیر نا دودوربیدگی رنگ آتے ہم تالان کننگک۔ پیشن نا ملک پاکستانی مشنز، سفارت خانہ غاتے ٹی ہم یوم پاکستان نا مناسبت اٹ خصوصی دود اڈتننگک ہرافتے ٹی صدر و وزیراعظم نا کلہو آتے خوانسا بنفنگک و قومی پرچم ءِ چست کننگک۔ داوخت آ مچ آ ملک اٹی قومی، سیاسی و راجی ادارہ غاتا کنڈآن تحریک پاکستان نا بابت خصوصی دود و پروگرام اڈتننگک۔ 23مارچ آ ہر سال آنبار لس تعطیل مریک۔ صوبائی دارالحکومت اٹی سہب انا بنا21وخت اس کہ بنجاٹی 31 توپ آتا سلامی آن مریک۔ مسیت آتے ٹی پاکستان نا بقاء و سلامتی کن خصوصی دعائیہ دود اڈتننگک۔ تعلیمی ادارہ و سول سوسائٹی تون اوار سیاسی و مذہبی جماعت آتا کنڈآن یوم پاکستان نا وخت آ خصوصی دود اڈتننگک۔ پرنٹ و الیکٹرانک میڈیا غا خصوصی ضمیمہ و پروگرام شینک و نشر کننگک۔ پاک فوج انا شعبہ تعلقات عامہ نا کنڈآن داسال یوم پاکستان نا وخت آ مسہ جتا ءُ پرومو جاری کننگانے ہرانا سرحال ءِ ’’پاکستان زندہ باد‘‘ تخنگانے۔ داوخت آ کانود نافذ کروک آ ادارہ غاتا کنڈآن سیکورٹی نا خصوصی بست و بند کننگانے وخت اس کہ الس نا آسراتی تا رداٹ اسلام آباد ٹریفک پولیس ہم خصوصی ٹریفک پلان اس جوڑ کرینے۔ یوم پاکستان نا وخت آ زند انا چندی بشخ آتے ٹی خذمت سرانجام تروک آ نمان شخصیت آتے اعزاز تننگک ، اعزاز تننگ نا دود ایوان صدر اٹی اڈ ہلیک ہراڑے صدر مملکت اعزاز آتے ایتک۔
