اسلام آباد۔ 21مارچ(اے پی پی) صدر مملکت ڈاکٹر عارف علوی پارینے کہ خلقت اٹی جان جوڑی و سفائی نا کلہو ءِ لس کننگ کن اسکول ، مسیت و منبر و میڈیا نا کڑد ءِ ودفوئی مریک، پوسکن آ پاکستان ہمو حالیت اٹ جوڑ مریک ہراتم غٹ اواری اٹ ہر اعتبار اٹ اودے مون آ دینہ۔ او پنچ شنبے نادے آ پراکٹر اینڈ گیمبل (پی اینڈ جی) پاکستان نا حکومت نا ساف سوز پاکستان پروگرام اٹی اوار مننگ نا بابت اڈ ہلوک آ دود آن تران کریکہ۔ داوخت آ وزیر مملکت موسمیاتی بدلی زرتاج گل ہم تران کرے۔ دود اٹی پی اینڈ جی پاکستان و وزارت موسمیاتی بدلی نا نیام اٹ ساف و سوز پاکستان پروگرام نا چرجوئی ٹی شریداری کن اسہ اہم او یو سے آ ہم دستخط کننگا۔ صدر مملکت تینا تران اٹی جان جوڑی و سفائی نا اہمیت آ زور شاغسا پارے کہ احتیاط و پرہیز درمان آن جوان ءِ انتئے کہ لس ناجوڑیک 46درسد متعدی ناجوڑی تیا تالان مریک ہرافتیان سفائی و ستھرائی اختیار کرسا بچنگ مننگ کیک۔ ملک انا 40 درسد چناتے ٹی ذہنی نشوونما نا کمتی نا سوب آتے ٹی غذائی کاختی، حفظان جان جوڑی نا ویل آک، اولاد اٹی مناسب وقفہ نا مفننگ و کم وئی نا برامک اوار ءُ۔ ہنداوڑ بوتل بند دیر ہم چاگڑد آ اسہ بھاریم اسے، دانا ایسری دیر ساف کننگ نا وڑوڈول درستی راستی کرفنگ نا ءِ ہرا کم خڑچ ہم ارے۔ اوپارے کہ بنداوی سفائی بے کچ المی و ننا ایمان نا بشخ اسے۔ دانا شاہدی دادے کہ ننا نبی خواجہ محمدؑ عرب اٹی دیر انا کاختی تیان پد ہم سفائی آ بھاز زور شاغا۔ ننا شاندار ءُ تاریخ اسے، ننے جان جوڑی و سفائی کن شعور ءِ لس کروئی مریک۔ دا چرجوئی ٹی اسکول آتا نصاب آتیا نظرثانی کرسا چناتے ٹی سفائی ، ستھرائی و دوتے سلنگ نا اہمیت ءِ بایدے ودفوئی مرے۔ صدر مملکت پارے کہ دابابت اسکول آک بدلی نا اہم ءُ پلیٹ فارم اس ثابت مننگ کیرہ۔ ہنداوڑ جان جوڑی، سفائی، ستھرائی و زالبول نا حق اکن مسیت نا منبر آن کلہو آتے لس کننگ نا ہم گرج ءِ۔ داوخت آ وزیر مملکت موسمیاتی بدلی زرتاج گل پارینے کہ اینو نا دا دود جہانی یوم جنگلات نا بابت آن اہم ءِ و داوخت آ وزارت موسمیاتی بدلی و پی اینڈ جی پاکستان نا نیام اٹ ایم او یو مثبت پیش رفت اسے۔ اوپارے کہ وزیراعظم عمران خان اولیکو راہشون ءِ ہرااسکول آتیان پیشن اِرا کروڑ 25لکھ چناتے تعلیم تننگ، شجر کاری ، چناتا جان جوڑی، سفائی، صنفی امتیاز ءِ مر کننگ و ورناتا ہیت ءِ کرینے، ننا حکومت نا وژن ساف و سرسوز پاکستان ءِ۔ اوپارے کہ دا بابت چناتا تعلیم و تربیت آ چکار کننگے تو او سفائی و ستھرائی نا ایمبیسیڈر مننگ کیرہ۔ سرکاری و نجی بشخ ءِ اواری اٹ چاگڑد نا ویل آتا مون ءِ توروئی ءِ۔ تدوک آ شش تُو اٹی خلقت نا رویہ غاتے ٹی مثبت بدلی بسنے و ہندا بدلی پوسکن آ پاکستان نا بنداو ءِ۔ اوپارے کہ وزارت موسمیاتی بدلی و پی اینڈ جی پاکستان نا نیام اٹ ایم او یو ستاکڑزک۔ دانا رداٹ پی اینڈ جی سفائی ستھرائی و چاگڑد نا رکھ انا تینا کوشست و پروگرام تے حکومتی گام گیج آتون ہم گرنچ کیک۔ داکان مست پراکٹر اینڈ گیمبل نا نائب صدر سمیع احمد دود انا بشخ ہلوک آتا ستاءِ کرسا پارے کہ پی اینڈ جی تینا کارپوریٹ پروگرام تا کمک اٹ اسہ جان جوڑ و حفظان جان جوڑی نا راج اس جوڑ کننگ کن کوشست کننگ ءِ۔ داچرجوئی ٹی حکومت پاکستان تون اواری اٹ دا کوشست آتے مون آ دننگک۔ داوخت آ اوپڑو کرے کہ پراکٹر اینڈ گیمبل پاکستان بروک آ مسہ سال اکن پاک ساف پاکستان نا عزم آ سلسا اِرالکھ 50 ہزار بندغ آتے 50ملین لٹر ساف دیر سرکیک۔ سیف گارڈ اسکول ایجوکیشن پروگرام نا کمک اٹ پنچ ملین چناتسکان رسینگ دوئی کننگک و دافتے ٹی سفائی و دوتے سلنگ نا عادت نا بابت آگاہی ودی کننگک ۔
