اسلام آباد۔ 21مارچ(اے پی پی) وزیراعظم عمران خان پنچ شنبے نادے آ نیوزی لینڈ نا ہم منصب جیسنڈا آرڈرن ءِ ٹیل فون کرے و کرائسٹ چرچ اٹی اِرا مسیت آتیا دہشت گرد جلہو نا مذمت ءِ کرے و حالیت آتون جوان وڑاٹ مون تننگ نا ستاءِ کرے۔ اوہندی کمامدارآتا دمدستی ردعمل و وزیراعظم نا کنڈآن مسلمان تیکن پبی شرف نا جوزہ نا ستاءِ کرے ۔ وزیراعظم عمران خان پارے کہ وزیراعظم جیسنڈا آرڈرن ودوک آ اسلامو فوبیا و جہانی انتہاپسندی نا رداٹ ایلو جہانی راہشون آتے کن اسہ مثال اس کرینے۔ اوپاکستان نا الس نا کنڈآن اونا جوزہ ہمدردی ، راہشون و فیصلہ غاتیا منت واری ءِ ہرفے، ہراپاکستان اٹی خلقت نا است ءِ کٹانے۔ وزیراعظم 50نہادی جان تا زیا ن آ دلی ہڑزخواہی کرے۔ اوپارے کہ پاکستان تینٹ ہم دہشت گردی نا گواچی مسنے و 70 ہزار آن زیات بے گناہ جانک زیان مسنو۔ وزیراعظم پارے کہ ڈکھ انا دا ساہت اٹی پاکستان نیوزی لینڈ نا حکومت و الس تون سلوک ءِ ۔ نیوزی لینڈ نا وزیراعظم پارے کہ نیوزی لینڈ دا واقعہ غان پد صدمہ ٹی ءِ۔ اووزیراعظم ءِ جلہو آن پد کروک آ دمدستی فیصلہ غاتا بارواٹ ہم معلومدار کرے ہرافتے ٹی فوجی طرز انا نیم خودکار و خودکار توفک و ریفل آتیا پابندی خلنگ اوار ءِ۔ اوجلہو اٹی پاکستانی تا قربانی خاص کر نعیم راشد نا جیرت و بہادری ءِ خراج عقیدت پیش کرے۔ جیسنڈا آرڈرن پارے کہ نیوزی لینڈ مسلم برادری نا خذمت آتے قدر انا نظر اٹ ہرک و اوفتے آجوئی و رکھ انا باوری کرفے۔ وزیراعظم عمران خان نیوزی لینڈ انا ہم منصب ءِ پاکستان نا دورہ ءِ کننگ نا سلہ ہم خلک۔
