اسلام آباد۔20مارچ(اے پی پی) مزن وزیر عمران خان ءَ نیوزی لینڈ ءِ شہر کرائسٹ چرچءِ مسیتانی سرءَ اُرشءَ شہید بوتگیں نعیم راشد ءِ لوگ بانک عنبرین نعیم ءِ گپاناں ساڑاتگ ءُ گشتگ کہ آئی ءِ اے لبز اسلامی عقیدہ ءُ ایمان ءِ پکّہ بوہگ اِنت۔ چارشمبے ءِ روچءَ وتی ٹویٹءَ مزن وزیر ءَ گشتگ کہ مسلم دنیا ءِ تہءُ ڈنءَ شہید نعیم راشد ءِ لوگ بانک ءِ لبز اللہ تعالیٰنبی کریم ﷺ ءِ سرءَ ایمان ءِ راستیں طاقتءَ را سرپد بوہگءَ بس اَنت ۔ نعیم راشد شہید ءِ لوگ بانک ءُ 21سالی طلحہٰ شہید ءِ مات عنبرین نعیم ءَ نیوزی لینڈ ءَ یک گلگودارےءَ گپءُ تران کنانءَ گشتگ کہ آئیءِ لوگ واجہ ءُ بچ ءَ دگہ مردمانی جانانی رکھینگءَ وتی جان ندر کتگ اَنت۔ ہمے اسلام ءِ درس اِنت۔ اسلام امنءُ ایمنی ءُ مہر محبتءِ دین اِنت۔آئی ءَ گشتگ کہ نعیم راشد یک ناترسیں مردمے بوتگ۔ آئیءَ مدام دومی ءِ کمک کتگ۔ یک جستے ءِ پسوءَ عنبرین نعیم ءَ گشتگ کہ من سرپد بں کہ منی عقیدہ ءَ منءَ نیزور بوہگءَ نیشتگ۔ منءَ آ ناشرکارءِ سرءَ بزگ بیت کہ آئی ءِ دلءَ کستءُ کینگ است بلے مہرءُ واہگ نیست۔ وتی بچ طلحہٰ شہیدءِ ہوالگءَ گپءُ تران کتگءُ آئیءَ گشتگ کہ آ ئیءَ کسانی ءَ ہم دومیءِ حیال داری کتگ۔ من وتی آ دگہ زھگاں گشاں کہ طلحہٰ ءِ وڑ جوڑ بہ بئے۔ وہد ے کہ عنبرین نعیم ءَ چہ جست کنگ بوت کہ آ پدا مسیتءَ رؤت گڑا آئیءَ پسو ءَ گشت کہ ، جی اؤ،،مسیتءِ رؤگءَ کس منءَ داشت نہ کنت۔ منءَ ہمے یکے چیزءَ ترندءُ مھکم کتگ۔
