90 درسد ناجوڑی تا سوب دندان تا سفائی نا مفننگ ءِ، خواجہ ﷺ جاگہ اس اوڑدہی کن ہناکہ ، وضوکریکہ و نن اٹ بش مسکہ تو مزواک کریکہ
اسلام آباد۔ 20مارچ(اے پی پی) صدر مملکت ڈاکٹر عارف علوی پارینے کہ 90 درسد ناجوڑی تا سوب دندان تا سفائی نا مفننگ ءِ، خواجہ ﷺ ہم مزواک کننگ نا تاکید کرینے و دابارواٹ چندی حدیث آک اریر، سنت نا پیروی و سفائی آن دندانک جوان مریرہ، ہردے جوانی اٹ دے اٹی اِرا وار بُرش کننگے۔ چارشنبے نادے آ باہ و دندان تا سفائی نا جہانی دے انا وخت آ تینا ویڈیو کلہو اٹی صدر مملکت پارے کہ دندان تا ناجوڑی نا بابت کنے دا یخین ءِ کہ 90 درسد ناجوڑی دندان تا سفائی مفننگ نا سوب آن مریک ، 2ناجوڑی بھاز اہم ءُ ہرافتیان اسٹ دندان تا سُو تیان دتر بننگ و دندان تا سُرنگ ءِ، وخت اس کہ ایلو ناجوڑی دندان تے پُو کننگ نا ءِ۔ اگہ بُرش کننگ و دندان تا سفائی ءِ کننگے تو داہڑتوم آ ناجوڑیک مفسہ، دادے پورو احتیاطی تدابیر پاننگ کینہ۔ ای سمجھیوہ کہ دے اٹی کم آن کم اِراوار برش ءِ کاریم اٹ ضرور اتنگے۔ سنت نا پیروی کن مزواک ہم کننگ کینہ۔ اگہ نم جاگہ اس ہِننگ اورے تو ولدا ہم دانا بست و بند ءِ کننگے کہ برش ءِ کاریم اٹ اتبو۔ اگہ نم سفائی کیرے تو دندان زہمی مریرہ نئے سُو تا تہہ ٹی مریک۔ دندان تا ناجوڑی مفک و مچ آ وئی ءِ تینا دندان تتون نم تیر کننگ کیرے۔ صدر مملکت پارے کہ مسٹ میکو گڑاای دا پاننگ خواوہ کہ خواجہ ﷺ نا سفائی نا بابت 15آن 20 حدیث آک ءُ ہرافتے ٹی خواجہ ﷺ مزواک کننگ نا تاکید کرینے، خواجہ ﷺ ءِ دندان تیان گند بننگ آن نفرت ئس ہنداخاطران جاگہ اس اوڑدہی کن ہناکہ تو مزواک کریکہ، وضو کریکہ تو مزواک کریکہ و نن اٹ بش مسکہ تو مزواک کریکہ۔ اونا پیروی نا اعتبار اٹ ہم دا دندان تا جان جوڑی نا خیال ءِ تخنگ نا گچین ءُ مثال اسے۔ اینو ہم دندان تا مرض انا علم پاہک کہ اگہ نم پابندی اٹ برش کیرے تو دندان تا ناجوڑی مفک۔ 20مارچ دندان و باہ انا جان جوڑی نا دے ءِ۔ اگہ نم سنت نا پیروی ءِ ہم کیرے، سفائی نا بست و بند ءِ کرے تو دندان تا صحت ہم گچین مریک۔
