یانگ جائی کی دہشت گردی نا مون ءِ توننگ و علاقائی امن نا کوشست آتے ٹی پاکستان نا کڑد انا ستاءِ کرے
بیجنگ۔ 20مارچ(اے پی پی) وزیر خارجہ شاہ محمود قریشی چارشنبے نادے آ چین نا حکمران جماعت کمیونسٹ پارٹی آف چائنا نا پولٹ بیورو نا باسک و سینٹرل فارن افیئرز کمیشن آف نا ڈائریکٹر یانگ جائی کی تون اوڑدہی کرے۔ اوڑدہی ٹی تین پہ تینی تعلقداری، علاقائی و جہانی معاملہ غاتیا سرجم گپ و تران کننگا۔ یانگ جائی کی دہشت گردی نا مون ءِ توننگ و علاقائی خاص وڑاٹ سویلی ایشیا ٹی امن نا کوشست آتے ٹی پاکستان نا کڑد انا ستاءِ کرے۔ اواوغانستان اٹی مفاہمت نا کوشست آتے ٹی کمکاری آ ہم پاکستان نا ستاءِ کرے ۔ وزیر خارجہ شاہ محمود قریشی داوخت آ چین و پاکستان نا نیام اٹ اولیکو سٹریٹجک ڈائیلاگ اٹی مروک آ گپ و تران آ است جمی نا درشانی ءِ کرے و پارے کہ داگپ و تران تین پہ تینی است خواہی نا معاملہ غاتیا ہڑتوم آ ملک آتا اسہ وڑ موقف نا درشانی ئس۔ اوچین نا کنڈآن تسلسل اتون پاکستان نا وتواجہی و علاقائی سالمیت نا مخ تفی نا ستاءِ کرے۔ اوچین پاکستان اقتصادی راہداری (سی پیک) نا بارواٹی پاکستان نا پکا عزم انا درشانی ءِ کرسا پارے کہ دا ڈٹ پاکستان نا شونداری و شونہالی ٹی اہم ءُ کڑد اس ادا کننگ ءِ۔ یانگ جائی کی پارے کہ پاک چین سنگتی ہر آزمائش اٹی پورو سلیسونے و ایلو ملک آتا تین پہ تینی تعلقداری تے کن اسہ مثال اسے ۔ اوپارے کہ سی پیک ہڑتوم آ ملک آتا نیام اٹ اقتصادی تعلقداری تیٹی پوسکن ءُ روح اس شاغانے۔ او وزیر خارجہ شاہ محمود قریشی ءِ پوسکن آ دور اٹی اسیجا آخبت کن الس نا کہول آ خڑکی تعلقداری استوار کننگ اٹ پبی کمکاری نا باوری ترفے۔
