ہڑتوم آ وزیراعظم آک پاکستان اٹی آٹو موبائل و ٹیلی مواصلات نا بشخ آتے ٹی زرکاری ٹی است خواہی تخوک آ کمپنی تا چیف ایگزیکٹو آفیسر آتا گول میز مذاکرہ غان تران کیرہ، ترجمان دفترخارجہ
اسلام آباد۔ 20مارچ(اے پی پی) وزیراعظم عمران خان نا سلہ غا ملائیشیا نا وزیراعظم ڈاکٹر مہاتیر محمد اینو(پنچ شنبے نادے آن) پاکستان نا مسہ دے ئی دورہ ءِ کیک۔ ملائیشیا نا وزیراعظم تون اوار بڑزکو کہول انا اسہ ڈل اس ہم پاکستان نا دورہ ءِ کیک ہراٹی چندی اہم کاروباری شخصیت آک ہم اوار اریر۔ ملائیشیا نا وزیراعظم 23مارچ آ یوم پاکستان پریڈ نا مہمان اعزاز مریک۔ ملائیشیا نا وزیراعظم ڈاکٹر مہاتیر محمد نا مصروفیت آتے ٹی صدر پاکستان تون اوڑدہی، وزیراعظم عمران خان تون اوڑدہی و اوکان پد ڈل انا کہول آ گپ و تران اوار ءِ۔ ہڑتوم آ وزیراعظم آک پاکستان اٹی آٹو موبائل و ٹیلی مواصلات نا بشخ آتے ٹی زرکاری ٹی است خواہی تخوک آ کمپنی تا چیف ایگزیکٹو آفیسر آتا گول میز مذاکرہ غان ہم تران کیرہ۔ دفترخارجہ نا ترجمان پارے کہ وزیراعظم مہاتیر محمد نا دورہ پاکستان آن ہڑتوم آ ملک آتا نیام اٹ برادرانہ و دوستانہ تعلقداریک پین سوگو مریرہ ۔ اوپارے کہ دا دورہ ٹی ہڑتوم آ ملک آک و الس نا فائدہ ہرفنگ کن معیشت، واپار، زرکاری، و دفاعی تعلقداری تیٹی ودکی آ چکار مریک۔
