ساڑی حکومت نواز شریف ، شہباز شریف ، زرداری نا برخلاف ہچ ءُ پوسکن ءُ کیس اس جوڑ کتنے، احتساب نا ادارہ غاک پورو آجو و وتواجہ ءُ
فیصل آباد۔ 20مارچ(اے پی پی) گورنر پنجاب چوہدری محمد سرور پارینے کہ ساڑی حکومت بیر ہلنگ نا سیاست آ باورکپک و نئے اونا حکومت نواز شریف ، شہباز شریف، زرداری تون اوار کس اسے نا برخلاف پوسکن ءُ کیس اس جوڑ کرینے بلکن دا غٹ کیس آک تدوک آ دورحکومت اٹی جوڑ کننگاسر ہرافتیا کانود نا رداٹ کارروائی برجاءِ و کانود غٹ اکن بریبر ءِ وخت اس کہ احتساب نا ادارہ پورو آجو و وتواجہ ءِ ہنداخاطران ہرادے جوان سمجھک ہمووڑ کننگ ءِ ہراٹی حکومت نا ہچ ءُ نیام تمنگ اس اف، نیز میڈیکل بورڈ نواز شریف نا بارواٹ انت کہ فیصلہ اس کیک اوڑا عملدرآمد کننگک۔ داکان بیدس وزیراعلیٰ پنجاب و پنجاب اسمبلی نا باسک آتا تنخواہ و آسراتی تا بل داسکان اوفتیا بتنے ولے ہراتم بریک تو سجفسا ملک و قوم انا فائدہ ٹی فیصلہ کننگک، داکان بیدس حکومت میرٹ پالیسی آ باور کیک و فیصل آباد نا اسہ ہم ادارہ سے ٹی اونا ہچ ءُ رشتہ دار اس سیاسی بنداو و سفارش آ بھرتی متنے۔ داکان بیدس کچ اٹنگا وسیلہ غاتے ٹی مرسا ملک ءِ جوڑ جاڑو شونداری نا کسر آ روان کننگ کن غٹ گام گیج آتے المی جوڑ کننگک۔ چارشنبے ناسہب اتون مدینہ یونیورسٹی سرگودھا روڈ فیصل آباد آ بننگ و اسہ مفاہمتی یات داشت اسے آدستخط نا دود انا وخت آ میڈیا تون گپ و تران اٹی اوپارے کہ نن غٹ انسان اُن و ناجوڑی نا ہچ ءُ ٹیم اس اف ہرکس آ بننگ کیک ۔ اوپارے کہ نواز شریف نا ناجوڑی و اونا درمان نا رداٹ اسہ بڑزکو کہولی میڈیکل بورڈاس ٹہیفنگانے ہرااونا ٹیسٹ و ایلو علامت و تشخیص آن پد فیصلہ ایتک کہ اونا درمان ہرا جاگہ غا مننگ کیک ہرادے مون آ تخسا حکومت دمدستی گام گیج آتے المی جوڑ کیک و میڈیکل بورڈ انا فیصلہ ءِ مون آ تخسا نواز شریف ءِ درمان نا غٹ آسراتی تے تننگک۔ اسہ سوج اسے نا ورندی ٹی گورنر پنجاب پارے کہ وزیراعلیٰ پنجاب و اسمبلی نا باسک آتا تنخواہ و مراعات آتے ٹی ودکی نا بل داسکان اوفتیا بتنے ولے ہراتم اوفتے بل دوئی مریک او اونا خوڑتی اٹ جاچ ءِ ہلنگ آن پد آئینی ، کانودی و معاشی چاہندارآتا سلاہ ءِ مون آتخسا وزیراعظم عمران خان نا پالیسی نا رداٹ اونا فیصلہ ءِ کینہ۔ اسہ سوج اسے نا ورندی ٹی اوپارے کہ نئے بیرہ اوتینٹ بلکن اونا حکومت میرٹ پالیسی آ باور کیک۔
