اسلام آباد ۔ 19 مارچ (اے پی پی) صدر مملکت ڈاکٹر عارف علوی ءَ گوشت کہ سینٹ آئین ءِ راستیں کوکا ءِ آدینک انت،اودا برزی ایوان گلے سیادی ءَ چہ برزبوت ہزمت ءَ کنگ انت ءُُ راجی ءُُ اُلسی دلچسپی ءِ کارانی سرا کانود ساچی کنگ انت۔آہاں اے گپ چیئرمین سینٹ محمد صادق سنجرانی ءِ گوما گپ ءُُ تران کنان ءَ کتگ ات۔آہاں سئے شمبے ءَ ایوان صدر ءِ تہ آئی ءَ گوں گند ءُُ نند کتگ۔ چیئرمین سینٹ ءَ صدر مملکت ءَ را سالینہ رپورٹ ھم پیش کتگ۔ صدر ءَ کانود ساچی ءِ کارءُُ پارلیمانی سفارتکاری ءِ تہ ایوان بالا ءِ کوشستاں را ساڑاتگ۔آہاں اے گپ ءَ را اجاگر کتگ کہ سینیٹ آف پاکستان ءَ ایشیائی پارلیمانی اسمبلی ءِ فورم ءِ سرا امن ءُُ دیمروئی ءِ پراھی ءِ ھاترا پارلیمانی راھشوناں را یکجاھ کتگ۔آہاں گوشت کہ ایشیائی پارلیمانی اسمبلی ءِ دیوان دانستہ وڈ ءَ گوادر ءَ برجم دارگ بوتگ ات تنکہ اے گپ ءَ را تاگت رسیت کہ گوادر زوت دمگی اقتصادی ءُُ بیئپاری ءِ بنجل جوڈ بوھگ انت۔ایشی ءِ پدا چیئرمین سینٹ محمد صادق سنجرانی ءَ صدر ءَ را سرپد کتگ کہ سینیٹ ءَ بنیاتی انسانی ھقانی رکھگ ءِ ھاترا کانود ساچی ءِ سرا کار برجاہ انت۔آہاں سینیٹ ءِ کانود ساچی ءِ ھوالہ ءَ چہ سوبمندی ءَ را ھم پدر کتگ ایشی ءَ فاٹا ءُُ پاٹا ءَ را بنجاہی دھارہ ءَ آرگ،زالبول ،زھگ ءُُ خواجہ سراءَ ءُُ تارکین وطن ءِ ھقانی ءِ ھوالہ چہ کانود ساچی ءُُ ابید سود وامانی تاں سر بوھگ ءِ باروا کانود ساچی ھوار انت۔آہاں گوشت کہ سینیٹ ءِ دیوان 13رند ءَ برجم بوتگ ایشی ءَ 111روچ ءُُ 78دیوان بوتگ ات۔ اوسطاً حاضری 64.46 درسد ات ،مچ 28 پرائیویٹ ممبرز بل، 15 حکومتی بلز ءُُ 7 آرڈیننسز دیما آرگ بوتگ ات۔صدر مملکت ءَ چیئرمین سینٹ ءِ کوشستاں را ساڑاتگ ایشی ءِ آسرءَ ھاسیں کمیٹی برائے کشمیر 10سال ءِ وھد ءُُ پاس ءِ پدا پارلیمانی کمیٹی جوڈ بوتگ ہمہ کہ پارلیمنٹ ءِ دوئیں ایوانءَ ھوار انت۔ صدر ءَ امیت پدر کتگ کہ اے کمیٹی بھارتی زوربرتگیں کشمیر ءِ تہ انسانی ھقانی ھلاپ ورزیءَ را دیما آرگ ءُُ اقوام متحدہ ءِ منگ نامہ ءِ ردا کشمیر ءِ جیڈھ ءِ گڈی حل پولگ ءِ ھاترا وتی سرجمیں کرد ادا کن ایت۔
