بیجنگ ۔ 19 مارچ (اے پی پی) دری کارانی بنجاہی وزیر شاہ محمود قریشی ءَ گوشت کہ پاکستان چین ءِ گوما سوگو ءِ اقتصادی سیادی ءِ واھگدار انت، گریبی ءِ تہ کمی ءُُ کرپشن ءِ گرودار ءِ ھاترا چین ءِ تجربگاں چہ پائدگ زورگ بہ بیت۔اے گپ آہاں سئے شمبے ءَ بیجنگ ءِ تہ چین ءِ نائب صدر وانگ کیشان ءِ گوما گند ءُُ نند ءِ درگت ءَ کتگ ات۔گند ءُُ نند ءِ تہ دودیمی سیادی ،پاک چین اقتصادی راہداری ءِ ھوار ھاسیں دمگی ءُُ میاں اوستمانی معاملہانی سرا ھیال ریچی کتگ۔مخدوم شاہ محمود قریشی ءَ 70 کروڑمردماں را گریبی ءِ لیک چہ درکنگ ءُُ کرپشن ءِ گرودار ءِ باروا چین ءِ کوشستاں را ساڑاتگ۔دری کارانی وزیر ءَ گوشت کہ پاکستان ءُُ چین ءِ سیادی مثالی انت ، پاکستان خطہ ءِ تہ دراھیں ھمساھگاں گوں شریں سیادیانی واھگدارانت۔آہاں گوشت کہ پاکستان ھم گریبی ءُُ کرپشن ءِ تہ کمی ءِ ھاتراچین ءِ تجربگاں چہ پائدگ چست کن ایت۔دری کارانی وزیر ءَ گوشت کہ پاکستان چین ءِ گوما مھکمیں سیادیءِ واھگدارانت۔ دوئیں راھشوناں پاک ۔چین سٹرٹیجک کمک ءِ سرا زور داتگ۔(
