ورناک راجی و اقتصادی شونداری کن حکومتی کوشست آتے ٹی اونا دُو ءِ سبک کیر، تینا تعلیم نا آب ءِ گچین کرسا دنیا کن مثال اس مننگ کینہ
اسلام آباد۔ 19مارچ(اے پی پی) صدر مملکت ڈاکٹر عارف علوی ورناتیا زور شاغانے کہ او ملک انا راجی و اقتصادی شونداری نا مسخت نا دوئی کننگ کن حکومتی کوشست آتے ٹی اونا دُو ءِ سبک کیر، چناتا تعلیم و تربیت اٹی استاد آتا کڑد کلیدی ءِ، علم ہیل تننگ صدقہ جاریہ ءِ ، تینا تعلیم نا آب ءِ گچین کرسا دنیا کن مثال اس مننگ کینہ۔ اوداہیت ءِ دوشنبے نادے آ داڑے اقراء یونیورسٹی نا کانووکیشن آن تران کرسا پارے۔ صدر مملکت پارے کہ ملک انا راجی و اقتصادی گچینی کن کاریم کننگ بیرہ حکومت نا کاریم اف بلکن دامسخت ءِ دوئی کننگ کن ورناتا بشخ ہلنگ ہم بھاز المی ءِ۔ اوپارے کہ دا ورناگریجویٹس آتا فرض ءِ کہ او ملک و راج انا خذمت ءِ کیر ہرافک اوفتا تعلیم اٹی تینا بشخ ءِ شاغار۔ اوفک پاکستان نا الس ءِ بایدے گیرام کپس ہرافتا سوب آن اوفک داڑسکان سرمسنو۔ صدر چناتا تعلیم و تربیت اٹی استاد و اوفتا لمہ و باوہ غاتا کڑد ءِ تالان کرسا پارے کہ راج انا خذمت ءِ کروک آک قدر انا قابل ءُ، چناتا تعلیم و تربیت اٹی استاد آتا کڑد کلیدی ءِ۔ وخت اتون استاد آتا زمواری تیٹی ودکی مننگ ءِ۔ اوپارے کہ تینا تعلیم نا آب ءِ گچین کرسا دنیا کن مثال اس مننگ کینہ۔ اوپارے کہ ساڑی ڈیجیٹل دور اٹی تعلیم و علم انا ہچ ءُ کمتی اس اف۔ گرج دا ہیت انا ءِ کہ خلقت ءِ علم و پٹ وپول نا پوسکن آ ذرائع اسکان رسینگ تننگے۔ صدرپارے کہ تعلیم نا بشخ وخت اتون اوار اوار جدت اختیار کننگ ءِ، پوسکن آ ٹیکنالوجی نا کاریم اٹ اتنگ آن علم وسعت اختیار کرینے، چندی بشخ آتے ٹی ہروڑنا معلومداری وخت آ دوئی کننگ مریک۔ صدر مملکت پارے کہ علم اصل چٹپک ، اوپارے کہ علم اسہ بھلو سمندر اسے، صدر داہیت آ زور شاغا کہ چنانا تعلیم و تربیت اٹی لمہ و باوہ نا ہم اہم ءُ کڑد اسے۔ اوطالب علم آتے پارت کرے کہ ہندن ءُ علم اس ہیل کیر ہراڑان راج ءِ فائدہ مرے۔ اوپارے کہ تعلیم دوئی کننگ پروک آ بندغ آتا زمواری ہم راج آ مریک۔ اوپارے کہ پاکستانی تاریخ انسانی ہمدردی و بڑزکو اخلاقی قدر انا مثال آتیان پُر ءِ۔ اوپارے کہ پاکستان فراخ دلی نا درشانی ءِ کرسا لکھ آ اوغان باہوٹ آتے جاگہ تس و جنگ آن بھس مروک ہمسایہ نا کم و ود 35لکھ اوغان باہوٹ آتا میزبانی ءِ کرے۔ داسہ ہم نن 25لکھ اوغان باہوٹ آتا میزبانی ءِ کننگ اُن ہراننا قوم انا بڑزکو کڑد و اخلاقی آب آتا آئینہ دار ءِ۔ اوداوخت آ گڑاس متمول دیکی ملک آتا رویہ نا ذکر ءِ کرے ہراک چنکو کچ اسے ٹی باہوٹ آتے ہم امنا کننگ آن پاناد کریر۔
