انسانی وسیلہ غاتا شونداری آ زرکاری ملک انا شونداری ٹی کلیدی حیثیت تخک
اسلام آباد۔ 19مارچ(اے پی پی) بنجائی وزیر خزانہ اسد عمر پارینے کہ انسانی وسیلہ غاتا شونداری آ زرکاری اہمیت تخوک و ملک انا شونداری ٹی کلیدی حیثیت تخک۔ اوداہیت ءِ سے شنبے نادے آ داڑے ہیومن کیپٹل سمٹ آن تران کرسا پارے۔ وزیر خزانہ پارے کہ ورناتے تعلیم تننگ و اوفتا شونداری آ زرکاری بھاز المی ءِ۔ تعلیم و انسانی وسیلہ غاتا شونداری آ زرکاری درحقیقت معیشت اٹی زرکاری اس مریک انتئے کہ داڑان اقتصادی فائدہ غاتا چندی جہت و دروشم ودی مریک ہراڑان جم اٹنگا ملکی معیشت ءِ فائدہ رسینگک۔ حکومت ءِ داحالیت آتا ادراک ءِ و دامسخت نا دوئی کننگ کن کاریم کننگ اٹ پرعزم ءِ۔ وزیر خزانہ پارے کہ انسانی شونداری و نیزگاری نا چٹفنگ کن ننے مالی حساب وکتاب آن بڑز ہُننگ نا گرج مریک، تدوک آ کیہی سال تیان پاکستان اٹی نیزگاری نا چٹفنگ و انسانی وسیلہ غاتا شونداری کن کوشست کننگ انگ ءِ ہنداسوب ءِ کہ اینو نا معاشی حساب وکتاب نا 20سال مست انا حساب وکتاب آن گچین ءِ ولے دا ہم راست ءِ کہ دنیا نا ایلو ملک آتے ٹی ہراترند شرح ٹی شونداری مسنے پاکستان اٹی اورفتار اٹی شونداری متنے۔ وزیر خزانہ پارے کہ پاکستان نیزگاری نا ویل اتون مون تننگ و اونا چٹفنگ کن کثیر الجہتی وڑوڈول اس تینا کیک، ساڑی حکومت اولیکو وار راجی رکھ انا کوشست آتے سوگو کننگ ءِ، نیزگاری نا چٹفنگ کن مربوط وڑوڈول و طرز عمل اس جوڑ کننگ انگ ءِ و دامسخت کن اسہ مقتدرہ اس جوڑ کننگک ولے اوپارے کہ ننے اختراعی مالیاتی وڑوڈول آتیے عملی دروشم اس تننگ کن اقتصادی وڑاٹ وسیلہ درکار ءِ۔ اوپارے کہ پاکستان ءِ اختراعی مالی خذمت آتے کن جہانی بینک و نجی بشخ آن کمک درکار ءِ ، اگہ ضرورت تما تو اختراعی مالی خذمت آتے کن حکومت کانودی سازی ہم کننگ کیک۔ وزیر خزانہ پارے کہ ادارہ غاتا ساخت اٹی گچینی اتنگ کن ہم حکومت گام گیج کننگ ءِ، پبلک پرائیویٹ پارٹنر شپ اتھارٹی اس جوڑ کننگانے دانا مسخت فنڈ آتے بنداوی پنجر و راجی بشخ انا شونداری آ خڑچ کننگ کن نجی بشخ اتون اواری اٹ کاریم کروئی ءِ۔ اوکان پد صحافی تتون گپ وتران اٹی اوپارے کہ پاکستان نا معیشت ءِ آجو کننگ وخت انا گرج ءِ ، معیشت ءِ اصول و ضابطہ ، شفاف فیصلہ سازی، پارلیمان و چاروکی ءِ سوگو کننگ، شفافیت و احتساب نا کمک اٹ نن نئے بیرہ بینا معیشت ءِ شون تننگ کینہ بلکن معیشت ءِ ہم آجو کننگ کینہ۔ داکان مست سمٹ آن تران کرسا جہانی بینک انا سویلی ایشیا ریجن نا وائس پریزیڈنٹ ہارٹوگ شیفر پارے کہ پاکستان نیزگاری ٹی کمتی نا بشخ اٹی پیش رفت کرینے۔ اوپارے کہ نیزگاری نا چٹفنگ کن تعلیم، جان جوڑی و ایلو بشخ آتا آب اٹی گچینی اتنگ نا گرج ءِ، دا اسہ کثیرالجہتی وڑاسے نا خواست ءِ کیک ۔ اوپارے کہ نیزگاری ٹی کمتی اتنگ کن گام گیج آتے ٹی زالبول ءِ گوجالنگ مفک۔ اوپارے کہ انسانی وسیلہ غاتے ٹی زرکاری نا چرجوئی ٹی نجی بشخ ءِ مون آ بننگ نا گرج ءِ۔
