اسلام آباد۔ 19 مارچ (اے پی پی) چیئرمین واپڈا لیفٹیننٹ جنرل (ر) سید مزمل حسین پارینے کہ مہمند ڈیم ڈٹ آ کاریم بروک آ ہفتہ غا بناکیک ، کنٹریکٹر تون مذاکرات نا کمک اٹ پی سی ون آن 18 ارب روپئی کم کرفینن، ڈیم انا تفنگ آن پشاور، چارسدہ و مردان اٹی جلاب نا خطرہ مرمریک ، تربیلا IV توسیع ڈٹ آن پیدوار برجاءِ و 30 ارب روپئی نا ریونیو دوئی مریک، گولن گول پاور پروجیکٹ پورو مننگ آن پد ہم چترال اٹی گریڈ اسٹیشن مفننگ نا سوب آن بجلی علاقہ ءِ ملپننگ ءِ۔ داخیال آتا درشانی ءِ او سے شنبے نادے آ قومی اسمبلی نا قائمہ کمیٹی آبی وسیلہ ءِ حوال ترسا کرے۔ دیوان نا کماشی ءِ کمیٹی نا چیئرمین نواب یوسف تالپور کرے وخت اس کہ دیوان اٹی محمد فاروق اعظم ملک، شیخ راشد شفیق، علی نوازاعوان، چوہدری جاوید اقبال وڑائچ ، فاروق خان، حامد حمید، خواجہ محمد آصف آن بیدس وزارت آبی وسیلہ، واپڈا ، فیڈرل فلڈ کمیشن ، ارسا و ایلو تعلقدار کمامدارآک ساڑی ئسر۔ چیئرمین واپڈا دیوان ءِ پارے کہ ستمبر 2017ء آن اپریل 2018 ء اسکان چندی ڈٹ آتیان 2487میگاواٹ بجلی سسٹم اٹی واپڈا اوار کرینے۔
