اسلام آباد ۔ 18 مارچ (اے پی پی) بنجاہی وزیر تعلیم ءُُ کسبی ہیلکاری شفقت محمود ءَ گوشت کہ ہمک سال ءَ سئے ورناء جاب مارکیٹ ءِ تہ آھگ انت،آہاں را ہنرمند جوڈ کنگ یک مزنیں چیلنج انت، حکومت ءِ اولی دلگوشی تعلیم ،جان سلامتی ءِ پھجارگ ءُُ گریبی ءِ ھلاسی انت۔آں دوشمبے ءَ ھندی ھوٹل ءِ تہ ورلڈ بینک ءِ نیمگا چہ پاکستان ءِ تہ سرمایہ کاری ءِ موضوع ءِ سرا برجمیں سمٹ ءِ دومی سیشن ءَ گوں تران کنگ انت۔آہاں گوشت کہ مزن وزیر عمران خان ءَ وتی اولی گشتانک ءِ تہ تعلیم ءُُ وردنی کمی ءِ سبب ءَ زھگانی نشونما نہ بوھگ ءِ گپ جتگ ات۔آہاں گوشت کہ مہ انسانی دیمروئی ءِ سرا کار کنگ اوں ءُُ مردماں را گریبی ءِ تبک چہ در کنگ مئے اولی دلگوشی انت۔ شفقت محمود ءَ گوشت کہ مئے کارگس پنچ شعبگ ءَ دلگوشی ایر کتگ انت ائی ءِ تہ شرح خواندگی ءِ تہ ودکی اولی دلگوشی انت۔آہاں گوشت کہ مئے ملک ءِ تہ 32درسد مردم تعلیم چہ زبہر انت،اے یک مستریں چیلنج انت۔آہاں گوشت کہ مئے دو کروڑ ءَ چہ گیش چک سکولءَ چہ درانت۔مئے حکومت ءَ اے چکاں را سکولءِ تہ داخلہ ءِ ھاترا یک جنز ءِ بندات کتگ۔اے جنز وفاقی دارالحکومت اسلام آباد ءِ تہ پائلٹ پراجیکٹ ءِ بستار ءَ شربناء کنگ بوتگ۔پبلک پرائیویٹ پارٹنرشپ ءِ وسیلگ ءَ فنی ہیلکاری ءِ ادارگ جوڈ کنگ انت ہمہ کہ معیاری ہیلکاری ءِ پھجارگ چہ آہاں را درملکی جاب مارکیٹ ءِ تہ نوکری ءِ زورگ ءَ کمک پھجارگ بیت۔ایشی ءَ چہ پیسر ءَ ورلڈ بینک ءِ نائب صدر برائے انسانی ترقی انیتا ڈکسن ءَ شرح خواندگی ءِ تہ ودکی ،زچہ ءُُ بچہ ءِ جان سلامتی ءُُ گریبی ءِ ھلاسی ءِ ھاترا ورلڈ بینک گامانی سرا روژنی مان کتگ۔اے موہ ءَ آہاں گوشت کہ نیوزی لینڈ ءِ تہ بوتگیں اپسوز ناک واکیہ ءِ سرا ڈکھ انت ءُُ آں اے واکیہ ءِ تہ شہید بوتگیں پاکستانیانی گم ءِ تہ بروبر ءِ شریدار انت۔
