کراچی نا ودوک آ آبادی و چاگڑدی ویل آتا مون ءِ توننگ نا مریس وختی ڈٹ بندی نا گرج ءِ، شونداری ڈٹ آتا سرسہبی کن المی ءِ کہ اوفتیا بنجائی و صوبائی حکومت اواری اٹ کاریم کیر
اسلام آباد۔ 18 مارچ(اے پی پی) وزیراعظم عمران خان پارینے کہ کراچی نا ودوک آ آبادی و الس ءِ مون تروک ویل خاص کر چاگڑدی ویل آتا مون ءِ توننگ نا مریس وختی ڈٹ بندی نا گرج ءِ تانکہ ہراڑے آبادی تون تعلقدار ویل آتا ایسراس پٹنگ مرے ہموڑے پدریسہ کم مروک خرسی ایریہ غاتا رکھ ءِ المی جوڑ کننگ مرے۔ اوداہیت ءِ دوشنبے نادے آ گرین لین ڈٹ اتون اوار کراچی ٹی بنجائی حکومت نا چندی شونداری ڈٹ آتیا پیش رفت نا بابت جاچ دیوان نا کماشی ءِ کرسا پارے۔ گورنر سندھ عمران اسماعیل، خصوصی کمکار افتخار درانی ، ترجمان ندیم افضل چن، سیکرٹری خزانہ ، سیکرٹری ڈٹ بندی، سیکرٹری کابینہ ، چیف سیکرٹری سندھ، چیف ایگزیکٹو آفیسر نا آئی ڈی سی ایل صالح احمد فاروقی وایلوفک ساڑی ئسر۔ دیوان اٹی گرین لین ڈٹ آ پیش رفت و اونا فعالیت نا بابت سرجم حوال تننگا وخت اس کہ کراچی پیکج نا رداٹ ایلو ڈٹ آتا ہم جاچ ءِ ہلنگا۔ وزیراعظم پارے کہ بنجائی حکومت نا رداٹ صوبہ سندھ و خاص کر کراچی ٹی بناء کروک آ شونداری ڈٹ آتا بنداوی مسخت الس ءِ مون تروک ویل آتے مر کننگ اٹ صوبائی حکومت نا کمک ءِ کننگ نا ءِ۔ دا شونداری ڈٹ آتا سرسہبی کن المی ءِ کہ السی راجی آسراتی نا دا ڈٹ آتیا بنجائی و صوبائی حکومت اواری اٹ کاریم کیر۔ اوپارے کہ چاگڑدی کچٹی ءِ مون آ تخسا کراچی کون آ بھلا شارتا غٹ ڈٹ آتے ٹی چاگڑد نا عنصر ءِ مون آ تخنگے۔
