اسلام آباد۔ 18 مارچ(اے پی پی) وزیراعظم عمران خان نا خصوصی پارت آ وزیر خارجہ مخدوم شاہ محمود قریشی اہم قومی امور و نیشنل ایکشن پلان آ پارلیمانی پارٹی تتون سلابت نا فیصلہ ءِ کرسا پارلیمانی جماعت آتا سلابتی کانفرنس اس بٹنگانے، سلابتی کانفرنس 28 مارچ آ بیگہ نا چار بجہ غا پارلیمنٹ ہاؤس اٹی اڈ ہلیک۔ وزارت خارجہ نا ترجمان نا رداٹ وزیر خارجہ شاہ محمود قریشی نا کنڈآن پارلیمانی جماعت آتا سرکڑدہ غاتے چھٹی اس رادہ کننگانے ۔ تینا چھٹی ٹی وزیر خارجہ پارینے کہ دسمبر 2014ء ٹی آرمی پبلک اسکول پشاور نا است ہسون واقعہ غان پد نیشنل ایکشن پلان اس جوڑ مسوسس، نیشنل ایکشن پلان غٹ سیاسی جماعت آتا سلابت اٹی قومی امنائی نا درشانی ئس۔ وزیر خارجہ نوشتہ کرینے کہ دہشت گردی نا عفریت نا چٹفنگ کن نیشنل ایکشن پلان نا چندی پلوآک ءُ، خارجہ پالیسی نا جہت آتا حامل چندی پلوآک نیشنل ایکشن پلان نا بشخ ءُ۔ اوپارے کہ پین ملک اسے نا برخلاف تینا گل زمین ءِ کاریم اٹ اتپننگ نا السی وعدہ نا پاسداری ہم نیشنل ایکشن پلان اٹی اوار ءِ، ہنداوڑ اقوام متحدہ نا پابندی تا بابت زمواری و انسداد دہشت گردی نا مالی کمکاری نا بابت جہانی خواست آتیا عملدرآمد ہم قومی حکمت عملی نا اہم ءُ بشخ اسے۔ اوپارے کہ دہشت گردی نا برخلاف ننا جہد پدریسہ نا اعادہ کن غٹ سیاسی جماعت آتے بشخ ہلنگ نا سلہ خلنگ اُن، دا سلابت پاکستان نا قومی حکمت عملی آ ترندی اٹ عملدرآمد کن ننا عزم انا تسلسل و اونا اہمیت ءِ دنیا ٹی تالان کیک۔ وزیر خارجہ مستی نوشتہ کرینے کہ نیشنل ایکشن پلان آ عملدرآمد پیدوار وڑاٹ پاکستان نا الس نا مریس وختی فائدہ ٹی ءِ۔
