اسلام آباد۔ 18 مارچ (اے پی پی) بنجائی وزیر مواصلات و ڈاکخانہ جات مراد سعید و موسمیاتی بدلی نا وزیر مملکت زرتاج گل پاریر کہ درخت انسانی زند ءِ ناگہانی مشکل آتیان بچفنگ اٹ اہم ءُ کڑد اس ادا کیک، 2013ء آن مست حکومت آک خیبر پختونخوا ٹی بے دڑدی اٹ درخت آتالس خون ءِ کننگا۔ داخیال آتا درشانی ءِ او فک دوشنبے نادے آ داڑے ساف ستھرا و سرسوز پاکستان نا بابت 7 دے ئی شجر کاری مہم نا چرجوئی ٹی مفاہمتی یات داشت آ تیا دستخط آتا دود آن تران کرسا کریر۔ مفاہمتی یات داشت آتیا دستخط پارکس اینڈ ہارٹیکلچر اتھارٹی و نیشنل ہائی وے اتھارٹی نا نیام اٹ کننگا۔ داوخت آ سیکرٹری مواصلات شعیب صدیقی، چیئرمین این ایچ اے جواد رفیق ملک، چیف کمشنر راولپنڈی جودت ایاز، ڈپٹی کمشنر اسلام آباد حمزہ شفقات، آئی جی موٹروے پولیس جان محمد خان تون اوار بڑزکو کمامدارآک ہم ساڑی ئسر۔ مراد سعید داوخت آ پارے کہ پی ایچ اے و این ایچ اے قومی شاہراہ تے سرسوز کننگ کن زمواری ءِ ہرفینو۔ ہنداخاطران این ایچ اے نا اواری اٹ مچ آ ملک اٹی شجرکاری مہم ءِ بناکننگانے ولے اینو خصوصی مہم نا بناءِ کننگ انگ ءِ ہرادے نن ساف ستھرا سرسوز پاکستان نا پن ءِ تسونن ، دا مہم اسہ ہفتہ اسکان برجاسلک اوکان پد دانا دنگ ءِ مچ آ ملک اٹی ودفنگک، مہم اٹی مچ آ ملک انا یونیورسٹی، کالجز و اسکول آتا طالب علم آتے ہم حصہ دار کننگک داکان بیدس ہندی نمائندہ غاک ہم داٹی اوار مریرہ۔ اوپارے کہ روڈ آتا زمواری کناءِ، قومی شاہرات و ملک ءِ ساف ستھرا و سرسوز ہمووخت آ سرسوز تخنہ ہراتم نن اوفتا است بڈی ءِ کینہ و داڑکن حکومتی کہول آ گڑاس کننگک، ہنداخاطران نن اسہ سد کلو میٹر روڈ ماڈل نا وڑاٹ پیش کننگ نا ڈٹ اس تیار کرینن ، داروڈ ماڈل بشخ اٹی شجر کاری کرسا اودے اسہ بڑزکو نمونہ سے نا وڑاٹ مچ آ ملک اٹی شاندار وڑاٹ پیش کننگک۔ اوپارے کہ آخبت اٹی ننا امر مریرہ ، دانا اندازہ ءِ ننا اینو نا کوشست آتیان بروک آچینک جوانی اٹ خلنگ کیرہ۔ اوپارے کہ لاہور عبدالحکیم موٹروے 30مارچ آ الس کن ملفنگک، ٹول پلازہ غاتا رش ءِ چٹفنگ کن اسہ خصوصی ءُ پروگرام اسے نا بناءِ کننگ اُن داپارسا بے کچ خوشی مننگ ءِ کہ این ایچ اے تدوک آ مہم آتے ٹی مچ آ ملک اٹی غٹ محکمہ غاتیان زیات شجرکاری کرے۔ اوپارے کہ ملک و قوم آ دا اللہ تعالیٰ نا خصوصی ءُ رحمت اسے کہ عمران خان کون ءُ سرکڑدہ اس ملا ، ہنداسوب ءِ کہ محکمہ غاتا تہہ ٹی اللہ تعالیٰ نن کونا خلقت آن کاریم ہلسا اوفتا کارکڑدگی ءِ گچین کننگ نا توفیق تسنے۔ این ایچ اے داوخت اسکان مالیت نا مد اٹی 19 ارب روپئی ودکی کرینے، انشاء اللہ بروک آ دے تیٹی داادارہ ہی آخا ایلو محکمہ غاک ہم وتواجہ مریرہ۔ اونا پاننگ ئس کہ ساڑی حکومت نا گام گیج آتیان این ایچ اے نا ریونیو ٹی مروک آ ودکی ءِ نن ملک اٹی چناتا تعلیم و شاری تا جان جوڑی آ خڑچ کننگ کن بنجائی حکومت ءِ ایتنہ، انسان تے کن ساف شفاف و جان جوڑ زند انا ضمانت سرسوز شاداب درخت آک ءُ بدبختی اٹ 2013ء آن مست انا حکومت آک 200 ارب روپئی نا درخت آتے بے رحمی اٹ قتل کریر۔ وزیر مملکت زرتاج گل دود آن تران کرسا پارے کہ دادود آ بٹنگ انگ آ غٹ آن مست منتظمین آتا منت واری ءِ ہرفوہ۔ اوپارے کہ سرسوز، شاداب و ساف ستھرا چاگڑد انسانی رویہ غاتے بدل کننگ اٹ اہم ءُ کڑد اس ادا کیک و ہندا وژن عمران خان نا ءِ کہ نن پاکستان ءِ سرسوز، شاداب و ساف ستھرا کین، وزارت مواصلات دابابت بھاز کاریم کرینے۔ وزارت موسمیاتی بدلی میٹرو تون اواری اٹ ملک انا دودوربیدگ، تہذیب و تمدن ءِ مون آ دننگ کن خصوصی گام گیج کننگ ءِ انتئے کہ ننا دودوربیدگ ننا درستی راستی ءِ و دادے گچین وڑاٹ پیش کننگ نا گرج ءِ۔ اوپارے کہ قدرتی آفت آتیان ملک و انسان تے بچفنگ کن درخت خلنگ المی ءِ و دا فرض ءِ نن تینٹ پورو کینہ۔ پاکستان نا چناچنا ، ورناءُ پیر انگاک دا مہم اٹی زیات آن زیات بشخ ہلیر۔ ہندا بدلی ءِ ہرانا وعدہ ءِ پاکستان تحریک انصاف خلقت تون کرینے۔ دود انا ایسر آ بشخ ہلوک آتے ٹی سوینئرز و یونیورسٹی کالج و اسکول نا طالب علم آتے ٹی شرٹس و ٹوپ بشخ وپانٹ کننگا۔
