ہمودے مراف ہراتم پاکستان اٹی توانائی نا ہول سیل مارکیٹ اس جوڑ مریک، ترکمانستان آن بجلی نا درآمد کننگ کن ورکنگ پڑک اس جوڑ، ایران آن گوادر و کرکی علاقہ غاتے کن بجلی نا درآمد کننگ کن مذاکرات جاری، بجلی نا بشخ وپانٹ نا نظام اٹی زرکاری ءِ ودفنگ نا گرج ءِ، بنجائی وزیر بجلی عمر ایوب خان
اسلام آباد۔ 15مارچ (اے پی پی) بنجائی وزیر بجلی عمر ایوب خان پارینے کہ حکومت الس ءِ اڑزان توانائی نا فراوانی کن گام گیج کننگ ءِ ، ہمودے مر اف ہراتم پاکستان اٹی توانائی نا مارکیٹ ہول سیل مارکیٹ اس جوڑ مریک، ترکمانستان آن بجلی درآمد کننگ کن ورکنگ پڑک اس جوڑ کرینن، ایران آن ہم گوادر و کرکی علاقہ غاتے کن بجلی نا درآمد کننگ کن مذاکرات مننگ ءِ، بجلی نا بشخ و پانٹ نا نظام اٹی زرکاری ءِ ودفنگ نا گرج ءِ، نیٹ میٹرنگ نا بابت کانفرنس زوت مریک، ویلنگ و نیٹ میٹرنگ آ عملدرآمد ءِ المی جوڑ کننگک، قومی بجلی پالیسی و قابل تجدید توانائی پالیسی نا پڑو ءِ زوت کننگک۔ اوداخیال آتا درشانی ءِ جمعہ نادے آ داڑے سینٹر ل پاور پرچیزنگ ایجنسی گارنٹی لمیٹڈ نا ڈیٹاایکسچینج پورٹل نا بنائی دود آن تران و اوکان پد صحافی تتون گپ و تران کرسا کرے۔ عمر ایوب خان پارے کہ توانائی مارکیٹ ءِ ہول سیل مارکیٹ اس جوڑ کننگ کن رولز اٹی ترمیم کننگ تون اوار اوار اڑاند آتے مر کینہ، داڑان صارف آتے فائدہ مریک بجلی نا پیدوار بشخ وپانٹ و ترسیل اٹی ہم گچینی بریک، توانائی نا نہاد اٹی ہم کمتی مریک و صارف آتا کٹیا تیٹی اڑزان بجلی ملنگ آن بچت مریک۔ اوپارے کہ نجی سیکورٹی کن ہم دا بھاز اہم ءِ اڑزان بجلی آن صنعت آتا پہیہ چلینگک، برآمد آتے ٹی ودکی مریک، کرنٹ اکاؤنٹ و مالیاتی نسخان ہرا ننکن اسہ ویل اس مسنے اوٹی ہم کمتی اتنگ کن گام گیج کننگ انگ ءِ۔ توانائی نا درآمد آ بھاز زیات زر خڑچ مریک داوخت آ نن 60 درسد بجلی تیل ، کولا و گیس ودی کننگ اُن، 30% بجلی ہائیڈل، 6 درسد نیو کلیئر و 4درسد قابل تجدید توانائی آن دوئی کننگ اُن۔ او پارے کہ 2030 ء اسکان بجلی نا پیدوار ءِ نن30 درسد اسکان قابل تجدید توانائی آ دینہ وہنداوڑ 55ہزار میگاواٹ کل بجلی نا پیداوار آن 18 ہزار میگاواٹ قابل تجدید توانائی آن دوئی مریک داکان بیدس 30 آن 40 درسد بجلی ہائیڈل 10 درسد نیوکلیر و ایلو تیل و کولاآن دوئی مریک۔ عمر ایوب خان پارے کہ بروک آ منہ دے تیٹی نیٹ مانیٹرنگ آن تعلقدار کانفرنس مننگ ءِ و ڈسٹری بیوشن کمپنی تیٹی نیٹ مانیٹرنگ آ عملدرآمد کرفینہ۔ اوپارے کہ یخ انا موسم اٹی ننا 8000 ہائیڈل بجلی 500 اٹی کورٹ آ بریک ننا جی ڈی پی نا وزن 300 ارب ڈالر ءِ ولے اگہ غیر رسمی معیشت ءِ ہم اوار کین تو دا 600 ارب ڈالر اسکان سرمریک۔ معاشی و صنعتی شونداری آن بجلی نا طلب ودنگ نا کنڈاہم چکار کروئی ءِ ، ایران گوادر و کرکی علاقہ غاتے بجلی فراوان کننگ خوانہ داڑاہیت وگپ مننگ ءِ، ترکمانستان ، اوغانستان نا کسر پاکستان ءِ بجلی برآمد کننگ خواہک، داڑکن اِرا ہزار میگاواٹ نا ٹرانسمیشن لین اکن ورکنگ پڑک اس جوڑ کرینن۔ اوپارے کہ ویلنگ و نیٹ میٹرنگ آعملدرآمد کرفنہ، بجلی نا پیدوار نا لحاظ اٹ 2030 ء اسکان ننا مارکیٹ 40 ارب ڈالر اسکان سرکیک۔ اوپارے کہ لاہور مٹیاری ٹرانسمیشن لین نا بنداو ءِ بروک آ منہ ہفتہ ٹی تخنگک وخت اس کہ ٹرانسمیشن لین تا نظام اٹی ہم گچینی اتنگ اُن۔
