اسلام آباد۔ 15مارچ(اے پی پی) بنجائی وزیر خزانہ اسد عمر پارینے کہ پاکستان امن نا داعی ءُ ملک اسے و نن علاقائی ملک آتون اوار مچ آ دنیا تون گچین تعلقداری و شریداری نا خواہندار اُن، سویلی ایشیا نا ڈیہہ ءِ جہانی اقتصادی شونداری نا ہند اس ہُننگ خوانہ ، ملک اٹی درملکی زرکاری و سیل و سوات نا مون آ دننگ کن کاریم کننگ اُن، پوسکن آ ویزہ آسراتی تا تننگ آن پاکستان نا تہذیبی میرات آتے جہانی کہول آ روشناس کرفنگ اٹ کمک رسینگک۔ اوداہیت ءِ جمعہ نادے آ داڑے وزارت خارجہ نا کنڈآن 27می ایڈوانس ڈپلومیٹک کورس انا گریجویشن دود آن مہمان خاص نا حیثیت اٹ تران کرسا پارے۔ سیکرٹری خارجہ تہمینہ جنجوعہ، فارن سروس اکیڈمی نا ڈائریکٹر جنرل آفتاب کھوکھر و وزارت خارجہ نا سینئر آفیسر آک ہم داوخت آ ساڑی ئسر۔ وزیر خزانہ پارے کہ کورس انا بشخ ہلوک آک، ہرافتا تعلق 18 ملک آتیان ءِ، اسہ ہندن ءُ وخت اسے ٹی پاکستان نا دورہ ءِ کرینو ہراتم برصغیر نا اِرا ہمسایہ ملک آتا نیام اٹ بے چیٹی عروج آ ئس، پاکستان داٹی ضبط و تحمل نا درشانی ءِ کرے، و امن و سوگوی کن غٹ تر کوشست آتے المی کننگا ہرافتا مشاہدہ ءِ کورس انا بشخ ہلوک آک المی وڑاٹ کرور۔ وزیر خزانہ پارے کہ پاکستان امن نا داعی ءُ ملک اسے و نن علاقائی ملک آتون اوار مچ آ دنیا تون گچین تعلقداری و شریداری تا خواہندار اُن، ننا است خواہی ءِ کہ سویلی ایشیا نا ڈیہہ جہانی اقتصادی شونداری نا ہند اس جوڑ مرے۔ بھارت تون تعلقداری تا حوالہ ءِ ترسا اوپارے کہ بے چیٹی تیٹی کمتی و حالیت آک معمول آبننگ ءُ ولے بھارت اٹی گچین کاری تا اڈتننگ اسکان پاکستان محتاط طرزعمل نا درشانی ءِ کیک، پاکستان بھارت تون اوار غٹ علاقائی ملک آتون تعلقداری تے مون آ دننگ خواہک، بھارت نا کنڈاسنگتی نا دُو ءِ مریفینن ولے اگہ بھارت مہم جوئی اس کرے تو دا دُو مُچ اس ہم جوڑ مننگ کیک، پاکستان تینا دفاع کن تیار ءِ، ملک انا دفاع سوگو انگا دوتے ٹی ءِ و نن تینا لمہ وطن نا رکھ انالائخی تخنہ۔ اوپارے کہ پاکستان اوغانستان اٹی امن و سوگوی نا اتنگ نا است خواہ ءِ ۔ اوغانستان اٹی امن نا عمل کن پاکستان نا کوشست آتا جہانی کہول آ ستاءِ کننگانے ، پاکستان اوغانستان اٹی امن کن مذاکراتی عمل نا مخ تفی ءِ برجاتخک۔ اسد عمر پارے کہ پاکستان اٹی امن و ایمنی نا حالیت آتے ٹی نمان گچینی بسنے ہرانا سوب آن ملک اٹی واپار و زرکاری نا وارخواہیک ودانو، پاکستان نا خاص انگا جغرافیائی محل و وقوع اہمیت تخک، پاکستان شاہراہ ریشم نا وت ءِ ، ملک اٹی چین پاکستان اقتصادی راہداری نا عملی اطلاق نا کاریم مننگ ءِ ہرانا پوروی آن پاکستان نا تینا آزموندہ سنگت چین نا نیام اٹ تعلقداریک پین سوگو مریرہ۔ ہنداوڑ ترکی تون اسٹریٹجک اقتصادی فریم ورک ءِ شون تننگ آ کاریم مننگ ءِ، سعودی عرب تون تعلقداری و کمکاری ءِ مون آ دننگ کن اسٹریٹجک تعلقداری کونسل ءِ جوڑ کننگانے۔ اوپارے کہ نن سویلی ایشیا ء نا ڈیہہ ءِ جہانی اقتادی شونداری نا ہند اس ہُننگ خوانہ ، ساڑی حکومت ملک اٹی درملکی زرکاری و سیل و سوات نا مون آ دننگ کن کاریم کننگ ءِ ، پوسکن آویزہ آسراتی تا تننگ آن پاکستان نا منفرد تہذیبی میرات آتے جہانی کہول آ روشناس کرفنگ اٹ کمک رسینگک۔ اوکورس انا بشخ ہلوک آتے کورس انا سرسہب پوروی آ مبارکبادی تس و دااومیت نا درشانی ءِ کرے کہ کورس انا بشخ ہلوک آک تینا تعلقدار ملک آتے ٹی پاکستان نا ہمو دروشم ءِ تالان کیر ہرانا مشاہدہ ءِ اوفک پاکستان اٹی تینا اڈکننگ اٹ کرینو۔ فارن سروس اکیڈمی نا ڈائریکٹر جنرل آفتاب احمد کھوکھر خطبہ بیابخیری ٹی پارے کہ کورس اٹی 18 ملک آتا 23بشخ ہلوک آک اوار ءُ ہرافک پاکستان نا چندی شار و اہم انگا تاریخی و تہذیبی میرات تخوک ہند آتا دورہ ءِ کرینو وپاکستانی تہذیب و دودوربیدگ نا چندی رنگ آتے خڑک آن خنار۔ اودااومیت نا درشانی ءِ کرے کہ بشخ ہلوک آ ک تینا ملک آتے ٹی پاکستان نا سفیر آتا کڑد ءِ ادا کیرہ۔ اوکان پد وزیر خزانہ و سیکرٹری خارجہ کورس انا بشخ آتے ٹی سرٹیفکیٹ بشخ وپانٹ کریر۔
