بنجائی وزیر ڈٹ بندی شونداری، اصلاحات و شماریات مخدوم خسرو بختیار نا ای سی او سیمینار آن تران

اسلام آباد۔ 15مارچ(اے پی پی) بنجائی وزیر ڈٹ بندی شونداری، اصلاحات و شماریات مخدوم خسرو بختیار پارینے کہ پاکستان ای سی او نا وژن نا پوروی کن پرعزم ءِ، ننے ای سی او نا ہدف آتا دوئی کننگ ءِ المی کننگ کن موثر مانیٹرنگ نا نظام نا گرج ءِ، سی پیک علاقائی رابطہ غاتے ٹی مون آ دننگ نا پبی وارخواہی فراوان کیک، سی پیک پاکستان ءِ ڈیہہ نا واپاری ہنداس جوڑ کیک۔ داخیال آتا درشانی ءِ او جمعہ نادے آ پی پی ایم آئی ٹی مسہ دے ئی ای سی او سیمینار نا ایسری سیشن آن تران کرسا کرے۔ بنجائی وزیر پارے کہ پاکستان ای سی او نا وژن نا پوروی کن پرعزم ءِ۔ ننے ای سی او نا ہدف آتا دوئی کننگ ءِ المی کننگ کن گچین مانیٹرنگ نا نظام نا گرج ءِ۔ اوپارے کہ سی پیک علاقائی رابطہ غاتے ٹی مون آ دننگ نا پبی وارخواہی فراوان کیک۔ سی پیک پاکستان ءِ ڈیہہ نا واپاری ہند جاٹ اس جوڑ کیک۔ اوپارے کہ اوغانستان اٹی سیاسی مفاہمت نا عمل پورو مننگ آن ہی ای سی او نا موقف مون آ بریک۔ ای سی او نا رداٹ علاقائی را بطہ غاتا مون آ دننگ بایدے اولیت مرے۔ علاقائی واپار نا مون آ دننگ کن درکار بنداری پنجر ءِ ہم شونداری تروئی ءِ۔ ہراڑکن درکار سرمایہ نا دوئی کننگ ءِ المی کننگ کن ای سی او ءِ بینک و شونداری ادارہ غاتون شریداری اس قائم کروئی مریک۔ اوپارے کہ وزارت ڈٹ انا پوسکن آ پنچ سالہ ڈٹ گڈیکو مرحلہ غاتے ٹی ءِ۔ دانا بنداوی تمبہ علاقائی واپار و رابطہ غاک ءُ۔ سارک سویلی ایشیائی ملک آتے خڑک اتنگ اٹ کڑد ادا کننگ کیک ولے اودے بھارت نا رویہ یرغمال کرینے ۔ مخدوم خسرو بختیار پارے کہ اقتصادی کمکار تنظیم اٹی علاقائی رابطہ غاتے مون آ دننگ نا بھلو لائخی اس ارے و داڑان باسک ملک آتا نیام اٹ واپار و واپاری سرجزآتے ٹی ودکی مننگ کیک۔ اوعلاقائی واپار ءِ ودفنگ کن میکنزم نا جوڑ کننگ نا گرج آ زور شاغانے و پارے کہ آخبت اٹی کمکاری کن پوسکن آ بشخ جاٹ آتا پیدواری ءِ کننگ نا گرج ءِ۔ وزیر ساحل ، ریل و روڈ انا کمک اٹ ملک آتے ملفنگ آ چکار کننگ آہم زور شاغا وپارے کہ علاقائی واپاری سرجزآتے ٹی ودکی کن واپار و زرکاری کن آسراتی تننگ نا ہم گرج ءِ۔ وزیر پارے کہ ای سی او نا وژن 2025ء شاندار ءُ فریم ورک اسے۔