دہشت گرد آتا تعلق ہچ ءُ مذہب اسے تون مفک، اسہ مذہب اس ہم دُن انگا گام گیج آتا تعلیم تفک
اسلام آباد۔ 15مارچ(اے پی پی) چیئرمین سینیٹ محمد صادق سنجرانی نیوزی لینڈ نا مسیت آتے ٹی مروک آ سم کاری نا واقعہ نا ترندی اٹ مذمت ءِ کرینے، جمعہ نا نماز نا خواننگ کن مچ مروک آ بندغ آتیا سم کاری ٹی چندی بندغ آک تپاخت و ٹھپی مسر۔ چیئرمین سینیٹ ٹھپی بندغ آتا زوت جان جوڑی کن دعاہم کرے۔ چیئرمین سینیٹ پارے کہ دہشت گرد آک تینا ہندامسخت آتے ٹی وخت اس ہم سرسہب مفسہ و دہشت گردی ہراڑے کہ مرے اونا پبی مذمت ءِ کینہ، دہشت گرد آتا تعلق ہچ ءُ مذہب و فرقہ سے تون مفک و دنیا نا اسہ مذہب اس ہم دُن انگا گام گیج آتا تعلیم تفک، دہشت گردی نا جنگ اٹی پاکستان بے شمار جانی و مالی قربانی تسنے۔ اوپارے کہ دہشت گرد آک امن نا دشمن ءُ، پاکستان نا پارلیمان، حکومت و الس نیوزی لینڈ تون سلوک ءُ۔ اونیوزی لینڈ نا سرکڑدہ غاتون یکجہتی نا درشانی ءِ کرے۔ سینیٹ اٹی قائد ایوان سینیٹر سیدشبلی فراز ہم نیوزی لینڈ ٹی مسیت آتیا جلہو نا ترندی اٹ مذمت ءِ کرے ۔ اوپارے کہ دہشت گردی اسہ جہانی ءُ ویل اسے و دانا تعلق ملک اسے تون یا راج اسے تون اف۔ اوپارے کہ دُن انگا انتہاپسندآتا ہچ ءُ مذہب اسے تون تعلق مفک۔
