ایوان بالا عدالتی نظام اٹی اصلاحات و صوبہ غاتا مر مر انگا علاقہ غاتے ٹی ہائی کورٹ نا بنچ آتا ٹہیفنگ کن المی کانود سازی کیک
اسلام آباد۔ 15 مارچ(اے پی پی) چیئرمین سینیٹ محمد صادق سنجرانی پارینے کہ ایوان بالا عدالتی نظام اٹی اصلاحات و صوبہ غاتا مر مر انگا علاقہ غاتے ٹی ہائی کورٹ نا بنچ آتا ٹہیفنگ کن المی کانود سازی کیک۔ داخیال آتا درشانی ءِ او سرگودہا، میانوالی و خوشاب بار ایسوی ایشن نا نمائندہ و ڈل آتون پارلیمنٹ ہاؤس اٹی گپ و تران کرسا کرے۔ ڈل اتون اوڑدہی ٹی سینیٹر ڈاکٹر غوث محمد نیازی ہم ساڑی ئس۔ محمد صادق سنجرانی پارے کہ صوبائی دارالحکومت آتیان مر مر انگا علاقہ غاتے ٹی ہائیکورٹ نا بنچ مفننگ نا سوب الس ءِ بھاز مشکل آک مون تروک ءُ۔ اوپارے کہ ہائی کورٹ نا ساڑی بنچ مقدمہ غاتا کچ اٹی بھاز زیات ودکی نا سوب ویل آتا گواچی ءِ۔ اوپارے کہ مقدمہ غاتا التواء نا بھلا سوب جج و بنچ آتا کمتی ءِ۔ چیئرمین سینیٹ پارے کہ سینیٹ نا قائمہ کمیٹی کانود و انصاف و ایلو تعلقدار ادارہ غاک دا چرجوئی ٹی جتا گام گیج چست کننگ ءُ ہراڑان نئے بیرہ عدالتی نظام ءِ پین گچین کننگ اٹ کمک رسینگک بلکن انصاف نا دمدستی فراوانی ٹی ہم کمک دوئی مریک۔ اوپارے کہ ہاؤس و فیڈریشن نا بنداوی مسخت صوبائی اکائی تا الس ءِ ہروڑآسراتی تننگ کن کانود سازی و گام گیج تجویز کننگ نا ءِ۔ ڈل چیئرمین سینیٹ ءِ پارے کہ سرگودہا ڈویژن اٹی ہائیکورٹ نا بنچ مفننگ نا سوب آن الس ءِ بھاز مشکل آک مون تروک ءُ۔ ہنداسوب ءِ کہ تعلقدار بار ایسوسی ایشنز دا ویل انا ایسری کن آخبتی بنداو تیا ہڑتال کننگ ءُ۔ چیئرمین سینیٹ بار ایسوسی ایشن تے ویل آتا ایسری کن ہروڑنا کمکاری نا باوری ترفے۔
