اسلام آباد۔ 15مارچ(اے پی پی) چیئرمین سینیٹ محمد صادق سنجرانی پارینے کہ کانود آ عملدرآمد و الس ءِ مون تروک ویل آتا ایسری کن آئینی ادارہ غاتا نیام اٹ مربوط رابطہ المی ءِ، ایوان بالا بنچ و بار انا نیام اٹ ہرگرنچی ءِ مون آ دننگ تون اوار اوار عدالتی نظام ءِ زیات جوان جوڑ کننگ کن تینا پبی کڑد ءِ ادا کننگ ءِ تانکہ انصاف نا دمدستی فراوانی ءِ المی جوڑ کننگ مرے۔ داخیال آتا درشانی ءِ او صدر اسلام آباد ہائی کورٹ بار ایسوسی ایشن راجہ انعام امین منہاس نا کماشی ٹی ڈل اتون پارلیمنٹ ہاؤس اٹی اوڑدہی ٹی گپ و تران کرسا کرے۔ محمد صادق سنجرانی پارے کہ داہیت ستاکڑزک کہ داوخت آ عدلیہ بار ایسوسی ایشنز و آئینی ادارہ غاتا نیام اٹ پبی کمکاری ساڑی ءِ۔ اوپارے کہ او اسلام آباد ہائی کورٹ بار و اسلام آباد ہائی کورٹ ءِ مون تروک ویل آتا بارواٹ جوانی اٹ سماءِ۔ اسلام آباد ہائی کورٹ اٹی جج آتا کچ انا ودکی نا بل ءِ سینیٹ نا قائمہ کمیٹی کانود و انصاف نا حوالہ کننگانے ہرا دا چرجوئی ٹی غٹ بار ایسوسی ایشنز و تعلقدار کڑدہ غاتا سلاہ تے ہلیک ہرافتے مون آ تخسا دا بل ءِ زیات گچین کننگ کن پیش رفت مریک۔ اوپارے کہ انصاف نا زوت فراوانی نئے بیرہ شاری تا گرج ءِ بلکن ریاست نا زمواری ہم ارے۔ اوپارے کہ ایوان بالا عدالتی نظام ءِ زیات گچین کننگ و مقدمہ غاتا زوت فیصلہ غاتے کن پبی گام گیج چست کننگ ءِ۔ چیئرمین سینیٹ اومیت ظاہر کرے کہ بار ایسوسی ایشن نا پوسکن گچین مروک آ سرکڑدہ غاک ادارہ جاتی ہم گرنچی نا مون آ دننگ و وکلابرادری نا ویل آتے پبی تالان کننگ اٹ تینا کڑد ءِ ادا کیک۔
