وزیراعظم عمران خان نا نیوزی لینڈ نا شار کرائسٹ چرچ اٹی مسیت آتیا دہشت گرد آتاجلہو نا مذمت
اسلام آباد۔ 15مارچ(اے پی پی) وزیراعظم عمران خان نیوزی لینڈ نا شار کرائسٹ چرچ اٹی مسیت آتیا دہشت گرد جلہو نا ترندی اٹ مذمت ءِ کرسا پارینے کہ دا جلہو بے کچ است ہسونی اسے، دا ننا دا موقف ءِ پک کیک کہ ہرادے نن پدریسہ وار وار پارساکرینن کہ دہشت گردی نا ہچ ءُ مذہب اس اف۔ جمعہ نا دے آ تینا ٹویٹ اٹی وزیراعظم پارے کہ ننا ہمدردیک و دعاک زہمی و اوفتا خاہوت آتون ءُ۔ وزیراعظم پارے کہ دا ودوک آ جلہو آتا پد اٹ نائن الیون آن پد ترندی اٹ تالان مروک آ ’’اسلاموفابیا ‘‘ کارفرماءِ ہرانا رداٹ دہشت گردی نا ہر کارروائی نا زمواری ءِ جم وڑاٹ اسلام و سوا ارب مسلمان تا کاٹم آ تخنگ نا چرجوئی برجائس۔ اوپارے کہ مسلمان تا روا سیاسی جہد ءِ نسخان تننگ کن ہم دا چمب ءِ آزموندہ کننگا۔
