اسلام آباد۔ 14مارچ (اے پی پی) بنجائی دارالحکومت اسلام آباد نا سیکٹر ڈی دُوانزدہ ٹی کلین اینڈ گرین پاکستان نا رداٹ شجر کاری، وزیر خزانہ اسد عمر نیال اس خلسا ہتم نا شجرکاری مہم نا بناءِ کرے۔ پنچ شنبے نادے آ شجرکاری نا چرجوئی ٹی اڈ ہلوک آ دود آن تران کرسا بنجائی وزیرخزانہ اسد عمر پارے کہ پاکستان نا شمار ہمو ملک آتے ٹی مریک ہرا چاگڑدی نا منفی زہم آتیان زہمی ءُ، ننے چاگڑد نا کچٹی ءِ توننگ کن گام گیج کروئی مریک۔ اوپارے کہ درخت خلنگ یا شجر کاری آن چاگڑد نا منفی اثرآتیان بچنگ ممکن ءِ۔ اسد عمر پارے کہ 15کروڑ نیال خلنگ نا ہدف ءِ تخنگانے۔ راج انا ہر بندغ نا زمواری ءِ کہ او داٹی زیات آن زیات بشخ ہلیر۔ اسد عمر پارے کہ بنجائی دارالحکومت اٹی دہ لکھ نیال خلنگ نا ہدف ءِ تخنگانے 5لکھ نیال اینخو نا ہتم و 5لکھ نیال برساتی آ موسم اٹی خلنگک۔ اسلام آباد ضلعی انتظامیہ نا دارداٹ کوشست آک ستاکڑزرہ۔ بنجائی وزیر پارے کہ اسلام آباد دنیا نا زیبا انگا دارالحکومت آتیٹی اوار ولے اسلام آباد نا زیبائی سبزہ کم مننگ آن ماند تمانے دادے ننے پدی اتوئی ءِ و کلین اینڈ گرین پاکستان تون اوار اوار سرسوز شاداب و ساف ستھرا اسلام آباد حکومت نا اولیت ءِ۔ داوخت آ ضلعی انتظامیہ و سی ڈی اے نا کنڈآن وزیر خزانہ اسد عمرو خصوصی کمکار علی نواز اعوان ءِ ضلعی انتظامیہ و سی ڈی اے آفیسر آتا کنڈآن جاری شجر کاری مہم نا بارواٹ ہم سرجم آتیان معلومدار کرے۔ وزیراعظم نا خصوصی کمکار سی ڈی اے امور علی نواز اعوان، چیف کمشنر اسلام آباد و چیئرمین سی ڈی اے عامر علی احمد، ڈپٹی کمشنر اسلام آباد حمزہ شفقات تون اوار ایلو ضلعی انتظامیہ ، سی ڈی اے و ایم سی آئی نا آفیسر آک ہم ساڑی ئسر۔
