اسلام آباد۔ 14مارچ(اے پی پی) صدر مملکت ڈاکٹر عارف علوی پارینے کہ اقتصادی کمکار تنظیم (ای سی او) ڈیہہ قطب و سویل ، یورپ و ایشیا نا نیام اٹ پول انا کڑد ءِ ادا کننگ نا پبی لائخی تخک وخت اس کہ ڈیہہ نا شونداری و شونہالی کن ای سی او نا اہم بشخ جاٹی اولیت آتا پیدواری تون اوار اوار مواصلاتی پنجر نا سوگوی، واپار و زرکاری ٹی آسراتی ودی کننگ نا گرج ءِ۔ اوداہیت ءِ ای سی او نا سیکرٹری جنرل ڈاکٹر ہادی سلمان پور تون گپ و تران کرسا پارے ہراپنچ شنبے نادے آ داڑے اوڑتون اوڑدہی کرے۔ صدر داہیت آ زور شاغا کہ ای سی او وژن 2025 ء تنظیم کن روڈ میپ انا حیثیت تخک۔ اوپارے کہ نن وژن 2025ء نا عملدرآمدی پنجر اٹی متعین کروک نظام الاوقات ءِ پورو کننگ کن المی گام گیج چست کننگ اُن۔ اوپارے کہ پاکستان دا ہیت آ باور کیک کہ ای سی او واپاری معاہدہ غاتیا گچین عملدرآمد واپاری اڑاند آتے کم کننگ و بالآخر ای سی او وژن 2025ء نا رداٹ آزادانہ واپاری علاقہ نا جوڑ کننگ نا کنڈا اہم ءُ گام اس جوڑ مریک۔ صدر پارے کہ پاکستان تینا ہمسایہ غاتے مصنوعات آتا ہن و بر اٹی آسراتی تننگ و ای سی او ڈیہہ نا تہٹی واپاری وارخواہی تے مون آ دننگ کن ریل و شاہراتی انفراسٹرکچر ءِ گچین جوڑ کننگ ءِ۔ اوداہیت ءِ تالان کرے کہ پاکستان اوغانستان ءِ کمک فراوان کننگ کن ای سی او نا کوشست آتے ٹی کمکار مریک و داوخت آ او اوغانستان نا تعمیر نو کن ای سی او نا گام گیج آتا بابت غٹ آن بھلا حصہ دار ءِ۔ سیکرٹری جنرل ای سی او ڈاکٹر ہادی پارے کہ پاکستان مدام ای سی او نا فعال باسک مسنے و ڈیہہ ٹی امن و کمکاری کن بنداوی حیثیت تخک۔ اوپارے کہ پاکستان اٹی ایکوٹورازم نا بھاز زیات لائخی ارے ہرا جہانی سیل و سواتی تے کن بھاز زیات است چکوک ءِ۔
