دہشت گردی نا مون ءِ توننگ آن پد داسہ پاکستان اٹی کرکٹ تون اوار گوازی تا جہانی مقابلہ غاک پدی بننگ ءُ
ہاکی و کرکٹ نا آخریکو ورلڈ کپ ءِ کٹنگ ءِ کیہی سال تدینگانے
اسلام آباد۔ 13مارچ (اے پی پی) بنجائی وزیر اطلاعات و نشریات چوہدری فواد حسین پارینے کہ دہشت گردی نا مون ءِ توننگ آن پد داسہ پاکستان اٹی کرکٹ تون اوار گوازی تا جہانی مقابلہ غاک پدی بننگ ءُ ، وزیراعظم عمران خان غٹ صوبہ غاتے پارت کرینے کہ تحصیل و یونین کونسل نا کہول آ گوازی تا میدان جوڑ کننگے، ہراراج انا گوازی تا پڑ آباد مریک او راج جوان وڑاٹ شونداری نا مزل آتے طے کیک، مون نا دورتیٹی وزارت گوازی نا است خواہی ہلپننگ نا سوب بھاز انگا گوازی تیٹی چاہنداری تخنگ آن پد ہم نتیجہ غاتے دوئی کننگ متو، ہاکی و کرکٹ نا آخریکو ورلڈ کپ ءِ کٹنگ ءِ کیہی سال تدینگانے، چناک و پوسکن آ چین ءِ کمپیوٹر، لیپ ٹاپ و موبائل فون آ گیم تیان مر کرسا اوفتے گوازی تا پڑ تیٹی اتنگ وخت انا اہم انگا گرج ءِ۔ او چارشنبے نادے آ سپورٹس کمپلیکس اٹی سپیریئر پڑک آف کالجز نا کنڈآن ’’اسپورٹس اینڈ کلچرل گالا2019‘‘ و نجی میڈیا گروپ نا کنڈآن شالیمار کرکٹ گراؤنڈ اٹی ’’کرکٹ لیگ‘‘ نا بنائی دود آن تران کریکہ۔ بنجائی وزیر اطلاعات و نشریات چوہدری فواد حسین پارے کہ قیام پاکستان آن پد کیہی بشخ آتا بابت گچین خبر بننگ بناکرے تو اوفتے ٹی گوازی تا بشخ نمان ئس، پاکستان ایتھلیٹکس ، ہاکی ، سکوائش تون اوار ایلو گوازی تیٹی میڈلز دوئی کروک آ ملک ئس، 1992ء ٹی کرکٹ و 1994ء ٹی ہاکی ٹی ورلڈ کپ ءِ ہلکوسس۔ داکان پد کیہی سال تدینگا پاکستان دا گوازی تیٹی ہچ ءُ بھلو و پیدوار ءُ سرسہبی اس دوئی کننگ کتو، دہشت گردی ہراڑے پاکستان نا ہر بشخ ءِ زہمی کرے ہموڑے پاکستان اٹی جہانی کرکٹ ہم بھاز زہمی مس۔ اوپارے کہ داسہ پاکستان سپر لیگ(پی ایس ایل) پاکستان آ پدی بس و کرکٹ نا گوازی ٹی ایلو ملک آتا ٹیمک ہم پاکستان آ بننگ ءُ ہرا ستاکڑزوک ءُ ہیت اسے۔ اوپارے کہ وزیراعظم عمران خان گوازی تا مون آ دننگ کن اسہ ٹاسک فورس اس جوڑ کرینے ہرا تینا کاریم ءِ جوان وڑاٹ سرانجام تننگ ءِ۔ اوپارے کہ گوازی تتون داکان بھلو بیدادی اس پین انت مریک کہ مسکوہی وزیر احسن اقبال گوازی تا 7 ارب نا بجٹ ءِ تینا حلقہ ٹی اسہ سپورٹس کمپلیکس اسے آ خلک، ایلو گوازی تا انت ءُ قصور اس ئس و اونا حلقہ غان بیدس ہم دُن ءُ سپورٹس کمپلیکس نا گرج ئس ولے بیرہ اسہ حلقہ اسے تننگا۔ داوڑنا بندغ آک جندی فائدہ غاتا خاطر گوازی تے بھس کریر۔ اوپارے کہ گوازی تا بشخ اٹی زالبول ءِ مون آ بروئی مریک، اگہ زالبول مون آ بفک تو ولدا اوفتے کن وارخواہیک ہم کچ اٹ مریرہ۔ اوپارے کہ 2012ء آن ہلیس 2016ء اسکان پاکستان نا اسہ درزن گوازی گر ہم دُن ءُ افس کہ ہرافک اولمپکس اٹی بشخ ہلنگ آن نمان سرسہبی دوئی کرینو۔ اوداکان پد شالیمار کرکٹ گراؤنڈ اٹی نجی میڈیا گروپ نا کنڈآن کرکٹ لیگ نا بناءِ گراؤنڈ اٹی بیٹنگ کرسا اسہ چوکا اٹ کرے۔ داوخت آ تران کرسا بنجائی وزیر چوہدری فواد حسین پارے کہ ہراتم ننا گوازی تا گراؤنڈ آک آباد مریر تو پہہ مبو کہ ملک درست سمت اٹی مون آ ہِننگ ءِ۔
