اسلام آباد۔ 13مارچ(اے پی پی) وزیراعظم نا سلاہکار واپار، ٹیکسٹائل، صنعت و پیداوار عبدالرزاق داؤد پارینے کہ حکومت چنکا و درمیانہ درجہ نا صنعت آتے مون آ دننگ کن گام گیج کننگ ءِ، صنعت آتا شونداری کن کارپوریٹ سیکٹر ءِ منظم کروئی مریک،پاکستان اٹی کارپوریٹ کلچر ءِ مون آ دننگ المی ءِ انتئے کہ کارپوریٹ سیکٹر چنکا و درمیانہ درجہ نا صنعت آتے گچین کاریم اٹ اتنگ کیک۔ چارشنبے نادے آ لیڈرز ان اسلام آباد سمٹ آن تران اٹی عبدالرزاق داؤد پارے کہ شونداری نا کسر اٹی بنداوی اڑاند امپورٹ کلچر ءِ ، دا صنعتی بشخ ءِ بھس کرے و ایکسپورٹ کلچر ءِ نسخان تس۔ اوپارے کہ پاکستان اٹی برآمد آتا تیاری نا بشخ ءِ اول سرآن ترتیب تننگ اُن، ننے درآمد آتے کم کرسا برآمد آتے ودفنگ آ چکار کروئی ءِ۔ اوپارے کہ دامسخت کن وزارت خزانہ و وزارت واپار ءِ تین پہ تینی کمکاری ءِ ودفوئی مریک۔ ملک اٹی 37 ہزار چنکا و درمیانہ درجہ نا صنعت آک تنکی نا گواچی ءُ حکومت دا تنکی ءِ چٹفنگ کن اسہ سٹڈی اس کرفنگ ءِ۔ دا سٹڈی آن ملوک آ سلاہ و سوج آتیا عمل کننگک، دُن انگا صنعت آتے کن ڈیوٹی و خراج اٹی آسراتی بنداوی اہمیت تخک۔ اوپارے کہ چنکا صنعت آتے تینا مال انا برآمد اٹی ہم آسراتی درکار مریک، دا اسہ حقیقت اسے کہ برآمد آتے ٹی ودکی کن دُن انگا صنعت آتا کڑد بے کچ اہمیت تخک۔
