وزیر مملکت موسمیاتی بدلی زرتاج گل نا بیکن ہاؤس اسکول سسٹم نا کنڈآن دود آن تران

اسلام آباد۔ 12مارچ (اے پی پی) وزیر مملکت موسمیاتی بدلی زرتاج گل پارینے کہ حکومت ہمو ڈٹ آتیا کاریم کننگ ءِ ہراڑان پاکستان ڈیہہ نا غٹ آن زیات سرسوز و شاداب ملک اس مننگ تون معاشی حب اس جوڑ مننگ والا ءِ ، پوسکن آ چین اٹی چاگڑدی کچٹی آن آگاہی وخت انا گرج ءِ۔ داخیال آتا درشانی ءِ او سے شنبے نادے آ نیشنل پریس کلب اٹی بیکن ہاؤس اسکول سسٹم نا کنڈآن چاگڑدی کچٹی نا بابت اڈ ہلوک آ دود آن تران اٹی کرے۔ زرتاج گل پارے کہ داہیت ننکن ستاکڑزک کہ پوسکن آ چین چاگڑدی بدلی و کچٹی تیان واقف ءُ۔ اوپارے کہ اینو نا دود اٹی اسکول نا چناک ہراوڑاٹ تینا موقف ءِ بیان کرینو داڑان اوفتا گچین و مثبت دروشم نا عکاسی مریک۔ اوپارے کہ وزیراعظم عمران خان نا کلین اینڈ گرین پاکستان ڈٹ آ پبی وڑاٹ کاریم مننگ ءِ و اسہ بلین سونامی ٹری نا ڈٹ سرسہبی اٹ برجاءِ۔ اوپارے کہ نن ملک انا ادارہ غاتون اواری اٹ شجرکاری مہم آ کاریم کننگ اُن ہراٹی تعلیمی ادارہ غاتا کڑد بے کچ کلیدی ءِ و طالب علم آک زیات آن زیات شجرکاری مہم اٹی بشخ ہلنگ ءُ۔ اوپارے کہ کنے اینو نا دود اٹی دا معلوم مس و بھاز خوشی مس کہ اسکول نا طالب علم آک چاگڑدی کچٹی آن چٹفنگ آن بیدس جنگلی حیات نا رکھ انا بارواٹ ہم شاندار ءُ وژن اس تخرہ ۔ داوخت آ دود آن تران کرسا اسکول نا پرنسپل سدرہ قاسم پارے کہ چاگڑدی کچٹی نا بابت آگاہی و فائدہ تروک معلومداری چناتا سلیبس نا بشخ اسے و اوفتے چاگڑددوستی و جنگلی حیات نا رکھ انا بابت پبی معلومداری تننگک۔ دود انا ایسر آ نیشنل پریس کلب نا لان اٹی علامتی آگاہی واک اسے نا ہم بست وبند کننگا۔