اسلام آباد۔ 12مارچ(اے پی پی) بنجائی وزیر جان جوڑی عامر محمود کیانی پارینے کہ غیر نصابی سرجزآتا تالان کننگ آ حکومت خصوصی چکار کننگ ءِ تانکہ طالب علم و ورناک راج اٹی جان جوڑ ءُ زند اس تدیفنگ کیر، جان جوڑ راج اکن گوازی نا گراؤنڈ آتا آباد مننگ بے کچ المی ءِ تانکہ ورناچین جان جوڑ سرجزآتے ٹی اوار مرسا ملک و قوم اکن تینا کڑد ءِ ادا کیر و منفی سرجز آتے توننگ مرے، تعلیم آن بیدس ہچ ءُ راج اس شونداری کننگ کپک ہنداخاطران ورناچین ءِ تعلیم نا پڑاٹی ہم پبی خواری کروئی مریک۔ داہیت ءِ او تینا حلقہ این اے 61 راولپنڈی ٹی گورنمنٹ ویمن کالج اٹی سالانہ اسپورٹس ڈے انا انعام آتا بشخ وپانٹ نا دود آن تران کرسا پارے۔ وزیر جان جوڑی پارے کہ حکومت جان جوڑی نا بشخ انا گچینی کن دے و نن کوشست کننگ ءِ، وزیراعظم عمران خان نا وژن نا رداٹ تعلیم و جان جوڑی نا بشخ ننا اولیت ءِ، دا چرجوئی ٹی غٹ تر وسیلہ غاتے کاریم اٹ اتنگ انگ ءِ۔ راولپنڈی نا ہسپتال نا گچینی کن وزیراعظم تینٹ ہم ہسپتال نا دورہ ءِ کرینے، الس ءِ آب اٹ درمان نا آسراتی تننگ ءِ المی کننگ کن ہسپتال آتا کارکڑد ءِ پین گچین کننگ اُن، زالبول ءِ راج اٹی اہم ءُ ہند اس ایتنہ و اوفتا ویل آتے اولیتی بنداو تیا ایسر کینہ۔ اوپارے کہ این اے 61 کنا حلقہ ءِ و دا حلقہ ٹی تعلیم و جان جوڑی نا آسراتی تے مثالی جوڑ کیوہ۔
