اسلام آباد۔ 12مارچ(اے پی پی) پاکستان و ترکمانستان پاکستان کن اوغانستان نا کسر بجلی نا ٹرانسمیشن لین نا خلنگ نا معاملہ غاتے گڈیکو دروشم اس تننگ کن اسیجا ورکنگ اس جوڑ کننگ نا فیصلہ کرینو، دا فیصلہ ءِ سے شنبے نادے آ داڑے ہڑتوم آ ملک آتا نیام اٹ ڈل آتا کہول آ مروک آ اوڑدہی ٹی کننگانے۔ پاکستانی ڈل انا سرکڑدہ ہی ءِ بنجائی پاور ڈویژن عمر ایوب خان وخت اس کہ ترکمانستان نا ڈل انا سرکڑدہ ہی ءِ ترکمانستان نا وزیر خارجہ راشد میری روف و ترکمانستان نا وزیر توانائی دوران ریجپو وکریکہ۔ داوخت آ بنجائی وزیر پاور ڈویژن عمر ایوب خان پارے کہ حکومت توانائی بشخ آ خصوصی چکار کننگ ءِ۔ پاکستان نا توانائی مارکیٹ پیشن نا زرکار آتے کن ملنگانے، پاکستان و ترکمانستان نا نیام اٹ توانائی نا بشخ اٹی کمکاری سویل ایشیا و نیامی ایشیا نا ایلو ملک آتا نیام اٹ ہم زرکاری نا وارخواہی تے ودفک۔ داوخت آ ترکمانستان نا وزیر خارجہ پارے کہ جم و جوش اٹ بخیر آ حکومت پاکستان نا منت وار اُٹ۔ ہڑتوم آ ملک آک تینا وسیلہ غاتے السی فائدہ غاتے ٹی اتنگ کن کمکاری ءِ ودفر۔ ترکمانستان نا وزیر توانائی پارے کہ ترکمانستان اٹی گیس انا بھلو کوڑی اس ارے۔ ترکمانستان اٹی گیس آن اڑزان بجلی ودی مریک۔ اوپارے کہ ترکمانستان تون ودکی اڑزان بجلی ارے۔ ترکمانستان دا اڑزان بجلی ءِ پاکستان ءِ برآمد کننگ کیک۔ اوپارے کہ ترکمانستان نا صدر خصوصی وڑاٹ اودے پارت کرینے کہ بجلی نا فراوانی نا ڈٹ ءِ فعال کننگ کن گپ و تران کننگے۔ دا ڈٹ ءِ پورو کننگ کن سوگو سیاسی عزم ساڑی ءِ۔
